bewafa kahne se kya wo bewafa ho jaega

bevafā kahne se kyā vo bevafā ho jā.egā

tere hote is sifat kā dūsrā ho jā.egā

shart kar lo phir mujhe barbād honā bhī qubūl

ḳhaak meñ mil kar to hāsil mudda.ā ho jā.egā

sar na hogā dosh par to kyā na hogī guftugū

hichkiyoñ se shukr qātil kā adā ho jā.egā

siina toḌā dil meñ chuTkī lī jigar zaḳhmī kiyā

kyā ḳhabar thī tiir bhī terī adā ho jā.egā

mere kahne meñ hai dil jab tak mire pahlū meñ hai

aap le liije ise ye aap kā ho jā.egā

saath un ke jaan bhī armān bhī jā.eñge aaj

sub.h se pahle ravāna qāfila ho jā.egā

maiñ malūñ talvoñ se āñkheñ vo kaheñ samjhūñgā maiñ

yaad rakh phīkā agar rang-e-hinā ho jā.egā

phir vahī jhagḌe kā jhagḌā hai agar qum kah diyā

teġh kā mansūḳh saarā faislā ho jā.egā

kis ḳhushī meñ haa.e kaisā ranj phailā kyā karūñ

kyā ḳhabar thī hañste hañste vo ḳhafā ho jā.egā

hashr tak kyuuñ baat jaa.e kyuuñ paḌe ġhairoñ ke muñh

ghar meñ samjhautā hamārā aap kā ho jā.egā

aañkh se hai vasl kā iqrār dil dugdā meñ hai

tum zabāñ se apnī kah doge to kyā ho jā.egā

zulm se gar zab.h bhī kar do mujhe parvā nahīñ

lutf se Dartā huuñ ye merī qazā ho jā.egā

us ne chheḌā thā mujhe tum jaan doge kab hameñ

kah diyā maiñ ne bhī jab vaada vafā ho jā.egā

yuuñ savāl-e-vasl par Taalā kiyā barsoñ koī

sabr kar muztar na ho terā kahā ho jā.egā

laakh duniyā meñ hasīñ hoñ laakh hūreñ ḳhuld meñ

mujh ko jo tū hai vo koī dūsrā ho jā.egā

tauba bhī kar lī thī ye bhī nashsha kī thī ik tarañg

aap samjhe the ki 'beḳhud' pārsā ho jā.egā

bewafa kahne se kya wo bewafa ho jaega

tere hote is sifat ka dusra ho jaega

shart kar lo phir mujhe barbaad hona bhi qubul

KHak mein mil kar to hasil muddaa ho jaega

sar na hoga dosh par to kya na hogi guftugu

hichkiyon se shukr qatil ka ada ho jaega

sina toDa dil mein chuTki li jigar zaKHmi kiya

kya KHabar thi tir bhi teri ada ho jaega

mere kahne mein hai dil jab tak mere pahlu mein hai

aap le lije ise ye aap ka ho jaega

sath un ke jaan bhi arman bhi jaenge aaj

subh se pahle rawana qafila ho jaega

main malun talwon se aankhen wo kahen samjhunga main

yaad rakh phika agar rang-e-hina ho jaega

phir wahi jhagDe ka jhagDa hai agar qum kah diya

tegh ka mansuKH sara faisla ho jaega

kis KHushi mein hae kaisa ranj phaila kya karun

kya KHabar thi hanste hanste wo KHafa ho jaega

hashr tak kyun baat jae kyun paDe ghairon ke munh

ghar mein samjhauta hamara aap ka ho jaega

aankh se hai wasl ka iqrar dil dugda mein hai

tum zaban se apni kah doge to kya ho jaega

zulm se gar zabh bhi kar do mujhe parwa nahin

lutf se Darta hun ye meri qaza ho jaega

us ne chheDa tha mujhe tum jaan doge kab hamein

kah diya main ne bhi jab wada wafa ho jaega

yun sawal-e-wasl par Tala kiya barson koi

sabr kar muztar na ho tera kaha ho jaega

lakh duniya mein hasin hon lakh huren KHuld mein

mujh ko jo tu hai wo koi dusra ho jaega

tauba bhi kar li thi ye bhi nashsha ki thi ek tarang

aap samjhe the ki 'beKHud' parsa ho jaega