wo be-wafa hai to kya mat kaho bura usko

vo be-vafā hai to kyā mat kaho burā us ko

ki jo huā so huā ḳhush rakhe ḳhudā us ko

nazar na aa.e to us kī talāsh meñ rahnā

kahīñ mile to palaT kar na dekhnā us ko

vo sāda-ḳhū thā zamāne ke ḳham samajhtā kyā

havā ke saath chalā le uḌī havā us ko

vo apne baare meñ kitnā hai ḳhush-gumāñ dekho

jab us ko maiñ bhī na dekhūñ to dekhnā us ko

abhī se jaanā bhī kyā us kī kam-ḳhayālī par

abhī to aur bahut hogā sochnā us ko

use ye dhun ki mujhe kam se kam udaas rakhe

mirī du'ā ki ḳhudā de ye hausla us ko

panāh DhūñD rahī hai shab-e-girafta-dilāñ

koī batāo mire ghar kā rāsta us ko

ġhazal meñ tazkira us kā na kar 'nasīr' ki ab

bhulā chukā vo tujhe tū bhī bhuul jā us ko

wo be-wafa hai to kya mat kaho bura us ko

ki jo hua so hua KHush rakhe KHuda us ko

nazar na aae to us ki talash mein rahna

kahin mile to palaT kar na dekhna us ko

wo sada-KHu tha zamane ke KHam samajhta kya

hawa ke sath chala le uDi hawa us ko

wo apne bare mein kitna hai KHush-guman dekho

jab us ko main bhi na dekhun to dekhna us ko

abhi se jaana bhi kya us ki kam-KHayali par

abhi to aur bahut hoga sochna us ko

use ye dhun ki mujhe kam se kam udas rakhe

meri du'a ki KHuda de ye hausla us ko

panah DhunD rahi hai shab-e-girafta-dilan

koi batao mere ghar ka rasta us ko

ghazal mein tazkira us ka na kar 'nasir' ki ab

bhula chuka wo tujhe tu bhi bhul ja us ko