bhag ki manzil-e-qarar umr ki rahguzar nahin

bhaag ki manzil-e-qarār umr kī rahguzar nahīñ

is meñ farār ke sivā aur koī mafar nahīñ

hai to balā-e-zindagī rasm-e-vafā magar nahīñ

baat ye hai ki ḳhair se shar pe mirī nazar nahīñ

shaiḳh jazā-e-kār-e-ḳhair ye jo batā rahā hai aaj

baat to ḳhuub hai magar aadmī mo'tabar nahīñ

bahr-e-husūl-e-mudda.ā raat din ek kījiye

rāh-e-talab ke vāste shaam nahīñ sahar nahīñ

rahte haiñ duur duur ham rasm-o-rivāj-e-zīst se

chalte haiñ jis pe aam log apnī vo rahguzar nahīñ

chhoḌ bhī dete mohtasib ham to ye shaġhl-e-mai-kashī

zid kā savāl hai to phir jā isī baat par nahīñ

kaun hai jo nahīñ shikār is meñ ḳhayāl-e-ḳhām kā

kyā hai ye bazm-e-zindagī dām-e-fareb agar nahīñ

'nātiq'-e-nīm-jāñ agar hai bhī to sub.h-o-shām kā

kal to ḳharāb-hāl thā aaj kuchh ḳhabar nahīñ

bhag ki manzil-e-qarar umr ki rahguzar nahin

is mein farar ke siwa aur koi mafar nahin

hai to bala-e-zindagi rasm-e-wafa magar nahin

baat ye hai ki KHair se shar pe meri nazar nahin

shaiKH jaza-e-kar-e-KHair ye jo bata raha hai aaj

baat to KHub hai magar aadmi mo'tabar nahin

bahr-e-husul-e-muddaa raat din ek kijiye

rah-e-talab ke waste sham nahin sahar nahin

rahte hain dur dur hum rasm-o-riwaj-e-zist se

chalte hain jis pe aam log apni wo rahguzar nahin

chhoD bhi dete mohtasib hum to ye shaghl-e-mai-kashi

zid ka sawal hai to phir ja isi baat par nahin

kaun hai jo nahin shikar is mein KHayal-e-KHam ka

kya hai ye bazm-e-zindagi dam-e-fareb agar nahin

'natiq'-e-nim-jaan agar hai bhi to subh-o-sham ka

kal to KHarab-haal tha aaj kuchh KHabar nahin