bhala ho jis kaam mein kisi ka to us mein waqfa na kijiyega

bhalā ho jis kaam meñ kisī kā to us meñ vaqfa na kījiyegā

ḳhayāl-e-zahmat na kījiyegā malāl-e-īzā na kījiyegā

vo mujh se farmā rahe haiñ hañs kar hamesha milne kī aarzū par

malāl hogā muhāl shai kī kabhī tamannā na kījiyegā

habāb hai zindagī kā naqsha kahāñ kā din māh-o-sāl kaisā

havā hai ye dam kā kyā bharosa umīd-e-fardā na kījiyegā

kiyā to hai ishq hazrat-e-dil liyā hai sar par ye bār-e-mushkil

huā agar mudda'ā na hāsil to raaz ifshā na kījiyegā

jo aap aa.eñ pa.e 'ayādat yaqīñ hai ho jaa.e mujh ko sehat

magar barā.e-ḳhudā ye zahmat kabhī gavāra na kījiyegā

jo ahl-e-duniyā ke the muḳhālif hue vo duniyā ke aur na diiñ ke

samajhiye ab ḳhātma hai diiñ kā jo fikr-e-duniyā na kījiyegā

ye qā.eda rasm-o-rāh kā hai ḳhayāl donoñ taraf ho yaksāñ

kisī ko parvā na hogī jis dam kisī kī parvā na kījiyegā

ta’alluq ahl-e-jahāñ se ho gar to rakhiye bīm-o-rajā barābar

sivā ḳhudā ke kisī ke upar kabhī bharosa na kījiyegā

'azīz hai jauhar-e-amānat kisī se ulfat ho yā adāvat

agar hai kuchh ġhairat-e-sharāfat to raaz ifshā na kījiyegā

bayān kī ehtiyāj hai kab rahā hai sirf ek harf-e-matlab

'habīb' kā dard-e-dil sunā sab ab is kā chāra na kījiyegā

bhala ho jis kaam mein kisi ka to us mein waqfa na kijiyega

KHayal-e-zahmat na kijiyega malal-e-iza na kijiyega

wo mujh se farma rahe hain hans kar hamesha milne ki aarzu par

malal hoga muhaal shai ki kabhi tamanna na kijiyega

habab hai zindagi ka naqsha kahan ka din mah-o-sal kaisa

hawa hai ye dam ka kya bharosa umid-e-farda na kijiyega

kiya to hai ishq hazrat-e-dil liya hai sar par ye bar-e-mushkil

hua agar mudda'a na hasil to raaz ifsha na kijiyega

jo aap aaen pae 'ayaadat yaqin hai ho jae mujh ko sehat

magar barae-KHuda ye zahmat kabhi gawara na kijiyega

jo ahl-e-duniya ke the muKHalif hue wo duniya ke aur na din ke

samajhiye ab KHatma hai din ka jo fikr-e-duniya na kijiyega

ye qaeda rasm-o-rah ka hai KHayal donon taraf ho yaksan

kisi ko parwa na hogi jis dam kisi ki parwa na kijiyega

ta’alluq ahl-e-jahan se ho gar to rakhiye bim-o-raja barabar

siwa KHuda ke kisi ke upar kabhi bharosa na kijiyega

'aziz hai jauhar-e-amanat kisi se ulfat ho ya adawat

agar hai kuchh ghairat-e-sharafat to raaz ifsha na kijiyega

bayan ki ehtiyaj hai kab raha hai sirf ek harf-e-matlab

'habib' ka dard-e-dil suna sab ab is ka chaara na kijiyega