bhala ho pir-e-mughan ka idhar nigah mile

bhalā ho pīr-e-muġhāñ kā idhar nigāh mile

faqīr haiñ koī chullū ḳhudā kī raah mile

kahāñ the raat ko ham se zarā nigāh mile

talāsh meñ ho ki jhūTā koī gavāh mile

qarīb-e-mai-kada mujh ko jo ḳhānqāh mile

gale savāb ke kyā kyā mire gunāh mile

vo roz-e-hashr hai duniyā nahīñ ki raah mile

kahāñ chhupoge jo do chaar dād-ḳhvāh mile

mirī ḳharābī meñ aa kar vo chaukḌī bhūle

ki phir na ḳhāna-ḳharābī ko ghar kī raah mile

tirā dil aa.e kisī par to arsh hil jaa.e

asar talāsh meñ hai is tarah kī aah mile

tumhāre kūche meñ har roz vo qayāmat hai

ki saaya DhūñD rahā hai kahīñ panāh mile

tirā ġhurūr samāyā hai is qadar dil meñ

nigāh bhī na milā.ūñ jo bādshāh mile

sar-barahna majnūñ pe āshiyāñ hai taaj

na rakkhe sar pe jo faġhfūr kī kulāh mile

falak kī tarah jafā.eñ na kījiye har roz

isī qadar hai ye ne.amat jo gaah gaah mile

tumhāre husn se kyā rutba māh-e-kan.āñ ko

vahī to chāñd jise Dūbne ko chaah mile

sab ahl-e-hashr jab apne kiye ko pā.eñge

baḌā mazā ho jo mujh ko mirā gunāh mile

karūñ maiñ arz agar jaan kī amaañ pā.ūñ

kahūñ pate kī agar qahr se panāh mile

ye hai maze kī laḌā.ī ye hai maze kā milāp

ki tujh se aañkh laḌī aur phir nigāh mile

huā hai dard-e-jigar se ye ghar mirā tārīk

ki maut DhūñDtī phirtī hai koī raah mile

na us ko sabr na tāsīr kā patā yā rab

jalā diyā hai mujhe ḳhaak meñ ye aah mile

balā se dāva-e-ulfat na pesh karte ham

mile hue haiñ jo dushman se vo gavāh mile

Thahar na aah mirī jaan le ke chalte ho

safar kare jo musāfir ko zād-e-rāh mile

masal sunī hai ki milne se koī miltā hai

milo to aañkh mile dil mile nigāh mile

qamar ko jāma-e-shab to basar ko parda-e-chashm

ka.ī libās tire nuur ko siyāh mile

asar kahāñ se mile jab ye phuuT ho bāham

alag alag rahe donoñ na harf-e-āh mile

lagā ke paañv meñ us ke uḌā.ūñ qāsid ko

agar mujhe tire tausan kī gard-e-rāh mile

is inqalāb meñ DhūñDo jo mushk aur kāfūr

to ye safed mile aur vo siyāh mile

naved-e-baḳhshish-e-isyāñ use sunā denā

jo sharmsār kahīñ 'dāġh'-e-rū-siyāh mile

bhala ho pir-e-mughan ka idhar nigah mile

faqir hain koi chullu KHuda ki rah mile

kahan the raat ko hum se zara nigah mile

talash mein ho ki jhuTa koi gawah mile

qarib-e-mai-kada mujh ko jo KHanqah mile

gale sawab ke kya kya mere gunah mile

wo roz-e-hashr hai duniya nahin ki rah mile

kahan chhupoge jo do chaar dad-KHwah mile

meri KHarabi mein aa kar wo chaukDi bhule

ki phir na KHana-KHarabi ko ghar ki rah mile

tera dil aae kisi par to arsh hil jae

asar talash mein hai is tarah ki aah mile

tumhaare kuche mein har roz wo qayamat hai

ki saya DhunD raha hai kahin panah mile

tera ghurur samaya hai is qadar dil mein

nigah bhi na milaun jo baadshah mile

sar-barahna majnun pe aashiyan hai taj

na rakkhe sar pe jo faghfur ki kulah mile

falak ki tarah jafaen na kijiye har roz

isi qadar hai ye neamat jo gah gah mile

tumhaare husn se kya rutba mah-e-kanan ko

wahi to chand jise Dubne ko chah mile

sab ahl-e-hashr jab apne kiye ko paenge

baDa maza ho jo mujh ko mera gunah mile

karun main arz agar jaan ki aman paun

kahun pate ki agar qahr se panah mile

ye hai maze ki laDai ye hai maze ka milap

ki tujh se aankh laDi aur phir nigah mile

hua hai dard-e-jigar se ye ghar mera tarik

ki maut DhunDti phirti hai koi rah mile

na us ko sabr na tasir ka pata ya rab

jala diya hai mujhe KHak mein ye aah mile

bala se dawa-e-ulfat na pesh karte hum

mile hue hain jo dushman se wo gawah mile

Thahar na aah meri jaan le ke chalte ho

safar kare jo musafir ko zad-e-rah mile

masal suni hai ki milne se koi milta hai

milo to aankh mile dil mile nigah mile

qamar ko jama-e-shab to basar ko parda-e-chashm

kai libas tere nur ko siyah mile

asar kahan se mile jab ye phuT ho baham

alag alag rahe donon na harf-e-ah mile

laga ke panw mein us ke uDaun qasid ko

agar mujhe tere tausan ki gard-e-rah mile

is inqalab mein DhunDo jo mushk aur kafur

to ye safed mile aur wo siyah mile

nawed-e-baKHshish-e-isyan use suna dena

jo sharmsar kahin 'dagh'-e-ru-siyah mile