bhale aadmi kahin baz aa are us pari ke suhag se

bhale aadmī kahīñ baaz aa are us parī ke suhāg se

ki banā huā ho jo ḳhaak se use kyā munāsibat aag se

bahut apnī taak buland thī koī biis gaz kī kamand thī

par uchhāl phāñdā vo band thī tire chaukī-dāroñ kī jaag se

bahut aa.e mohre kaḌe kaḌe vo jo muñD-jī the baḌe baḌe

vale aise to na nazar paḌe ki jo saaf paak hoñ laag se

vo siyāh-baḳht jo raat ko tire dām-e-zulf meñ phañs gayā

use aa ke vahm-o-ḳhayāl ke lage Dasne saikḌoñ naag se

bharā maiñ ne bindrāban meñ jo are kishn hop kā na.ara to

mahārāj nāchte kūdte chale aa.e laT-paTī paag se

lage kahne khem-kusal use jo 'alī' ke dhyān ke biich hai

tore dukh-daliddar jitte the ga.e bhaag aap ke bhaag se

ho.e āshiq un ke haiñ mard o zan ye anokhī un kī bhī kuchh nahīñ

koī taaza aa.e haiñ barhaman ye jo kāshī aur praag se

tujhe chāhte nahīñ ham haiñ bas unhoñ ko bhī to tirī havas

vo jo bhakḌe ber se sau baras ke purāne būḌhe haiñ daag se

ai lo aa.e aa.e sivā.e kuchh nahīñ baat dhyān meñ chaḌhtī kuchh

kuchh ik in faqīroñ kī majliseñ bhī to miltī-jultī haiñ bhaag se

mujhe kaam un ke jamāl se na to Tappe se na ḳhayāl se

na to vajd se na to haal se na to naach se na to raag se

ye sa.ādat us ko 'alī' ne dī jo vazīr-e-āzam-e-hind hai

ki badaulat us kī jahān meñ nahīñ ḳhauf bakrī ko baag se

mujhe rahm aatā hai aisoñ par basar apne karte haiñ vaqt jo

kisī phal se yā kisī phuul se kisī paat se kisī saag se

guthī in suroñ hī meñ aa ga.ī mujhe ik uruus ke baas se

abhī 'inshā' apnā ho bas agar to lipaT hī jā.ūñ bahāg se

bhale aadmi kahin baz aa are us pari ke suhag se

ki bana hua ho jo KHak se use kya munasibat aag se

bahut apni tak buland thi koi bis gaz ki kamand thi

par uchhaal phanda wo band thi tere chauki-daron ki jag se

bahut aae mohre kaDe kaDe wo jo munD-ji the baDe baDe

wale aise to na nazar paDe ki jo saf pak hon lag se

wo siyah-baKHt jo raat ko tere dam-e-zulf mein phans gaya

use aa ke wahm-o-KHayal ke lage Dasne saikDon nag se

bhara main ne bindraban mein jo are kishn hop ka nara to

mahaaraj nachte kudte chale aae laT-paTi pag se

lage kahne khem-kusal use jo 'ali' ke dhyan ke bich hai

tore dukh-daliddar jitte the gae bhag aap ke bhag se

hoe aashiq un ke hain mard o zan ye anokhi un ki bhi kuchh nahin

koi taza aae hain barhaman ye jo kashi aur prag se

tujhe chahte nahin hum hain bas unhon ko bhi to teri hawas

wo jo bhakDe ber se sau baras ke purane buDhe hain dag se

ai lo aae aae siwae kuchh nahin baat dhyan mein chaDhti kuchh

kuchh ek in faqiron ki majlisen bhi to milti-julti hain bhag se

mujhe kaam un ke jamal se na to Tappe se na KHayal se

na to wajd se na to haal se na to nach se na to rag se

ye saadat us ko 'ali' ne di jo wazir-e-azam-e-hind hai

ki badaulat us ki jahan mein nahin KHauf bakri ko bag se

mujhe rahm aata hai aison par basar apne karte hain waqt jo

kisi phal se ya kisi phul se kisi pat se kisi sag se

guthi in suron hi mein aa gai mujhe ek urus ke bas se

abhi 'insha' apna ho bas agar to lipaT hi jaun bahag se