bhaTakta karwan hai aur main hun

bhaTaktā kārvāñ hai aur maiñ huuñ

talāsh-e-rā.egāñ hai aur maiñ huuñ

batā.ūñ kyā tumheñ hāsil safar kā

adhūrī dāstāñ hai aur maiñ huuñ

nayā kuchh bhī nahīñ qisse meñ mere

vahī bojhal samāñ hai aur maiñ huuñ

har ik jānib tilismātī manāzir

nazar kā imtihāñ hai aur maiñ huuñ

koī shāhid nahīñ sajdoñ kā mere

jabīñ par ik nishāñ hai aur maiñ huuñ

shikasta bāl-o-par takte haiñ mujh ko

fasīl-e-āsmāñ hai aur maiñ huuñ

duā māñgūñ kahāñ kis dar pe jā ke

dayār-e-be-amāñ hai aur maiñ huuñ

bahut dhundlī nazar aatī hai duniyā

umīdoñ kā dhuāñ hai aur maiñ huuñ

bhaTaktā huuñ zamīñ par sar-barahna

falak kā sā.ebāñ hai aur maiñ huuñ

bhaTakta karwan hai aur main hun

talash-e-raegan hai aur main hun

bataun kya tumhein hasil safar ka

adhuri dastan hai aur main hun

naya kuchh bhi nahin qisse mein mere

wahi bojhal saman hai aur main hun

har ek jaanib tilismati manazir

nazar ka imtihan hai aur main hun

koi shahid nahin sajdon ka mere

jabin par ek nishan hai aur main hun

shikasta baal-o-par takte hain mujh ko

fasil-e-asman hai aur main hun

dua mangun kahan kis dar pe ja ke

dayar-e-be-aman hai aur main hun

bahut dhundli nazar aati hai duniya

umidon ka dhuan hai aur main hun

bhaTakta hun zamin par sar-barahna

falak ka saeban hai aur main hun