bhiD mein ek ajnabi ka samna achchha laga

bhiiḌ meñ ik ajnabī kā sāmnā achchhā lagā

sab se chhup kar vo kisī kā dekhnā achchhā lagā

surma.ī āñkhoñ ke nīche phuul se khilne lage

kahte kahte kuchh kisī kā sochnā achchhā lagā

baat to kuchh bhī nahīñ thiiñ lekin us kā ek dam

haath ko hoñToñ pe rakh kar roknā achchhā lagā

chaa.e meñ chīnī milānā us ghaḌī bhāyā bahut

zer-e-lab vo muskurātā shukriya achchhā lagā

dil meñ kitne ahd bāñdhe the bhulāne ke use

vo milā to sab irāde toḌnā achchhā lagā

be-irāda lams kī vo sansanī pyārī lagī

kam tavajjoh aañkh kā vo dekhnā achchhā lagā

nīm-shab kī ḳhāmoshī meñ bhīgtī saḌkoñ pe kal

terī yādoñ ke jilau meñ ghūmnā achchhā lagā

is adū-e-jāñ ko 'amjad' maiñ burā kaise kahūñ

jab bhī aayā sāmne vo bevafā achchhā lagā

bhiD mein ek ajnabi ka samna achchha laga

sab se chhup kar wo kisi ka dekhna achchha laga

surmai aankhon ke niche phul se khilne lage

kahte kahte kuchh kisi ka sochna achchha laga

baat to kuchh bhi nahin thin lekin us ka ek dam

hath ko honTon pe rakh kar rokna achchha laga

chae mein chini milana us ghaDi bhaya bahut

zer-e-lab wo muskuraata shukriya achchha laga

dil mein kitne ahd bandhe the bhulane ke use

wo mila to sab irade toDna achchha laga

be-irada lams ki wo sansani pyari lagi

kam tawajjoh aankh ka wo dekhna achchha laga

nim-shab ki KHamoshi mein bhigti saDkon pe kal

teri yaadon ke jilau mein ghumna achchha laga

is adu-e-jaan ko 'amjad' main bura kaise kahun

jab bhi aaya samne wo bewafa achchha laga