bigaD mein bhi banao hai aadmi ke liye

bigāḌ meñ bhī banāo hai aadmī ke liye

ujaḌ rahā huuñ maiñ ik taaza zindagī ke liye

badal ga.e haiñ zamāne ke saath husn ke taur

kuchh aur chāhte ab rasm-e-āshiqī ke liye

ye soch kar ki ināyat kiyā huā hai tirā

duā na māñgī kabhī dard meñ kamī ke liye

mulāhiza ho ye īsār-e-phūl hañs hañs kar

ujaḌ rahā hai kalī kī shaguftagī ke liye

gumān tak meñ na thiiñ jibra.īl ke jo kabhī

vo rif.ateñ haiñ yaqīn aaj aadmī ke liye

pilā ke zahr hī be-gāna-e-do-ālam ko

taras gayā huuñ maiñ thoḌī sī be-ḳhudī ke liye

kuchh aur teġh-e-vafā zahr meñ bujhā.e jā

yahī hai āb-e-hayāt aaj zindagī ke liye

bigaD mein bhi banao hai aadmi ke liye

ujaD raha hun main ek taza zindagi ke liye

badal gae hain zamane ke sath husn ke taur

kuchh aur chahte ab rasm-e-ashiqi ke liye

ye soch kar ki inayat kiya hua hai tera

dua na mangi kabhi dard mein kami ke liye

mulahiza ho ye isar-e-phul hans hans kar

ujaD raha hai kali ki shaguftagi ke liye

guman tak mein na thin jibrail ke jo kabhi

wo rifaten hain yaqin aaj aadmi ke liye

pila ke zahr hi be-gana-e-do-alam ko

taras gaya hun main thoDi si be-KHudi ke liye

kuchh aur tegh-e-wafa zahr mein bujhae ja

yahi hai aab-e-hayat aaj zindagi ke liye