bite hue dinon ki halawat kahan se laen

biite hue dinoñ kī halāvat kahāñ se laa.eñ

ik mīThe mīThe dard kī rāhat kahāñ se laa.eñ

DhūñDeñ kahāñ vo nāla-e-shab-tāb kā jamāl

āh-e-sahar-gahī kī sabāhat kahāñ se laa.eñ

samjhā.eñ kaise dil kī nazākat kā mājrā

ḳhāmoshi-e-nazar kī ḳhitābat kahāñ se laa.eñ

tark-e-ta.alluqāt kā ho jis se ehtimāl

bebākiyoñ meñ itnī sadāqat kahāñ se laa.eñ

afsurdagi-e-zabt-e-alam aaj bhī sahī

lekin nashāt-e-zabt-e-masarrat kahāñ se laa.eñ

har fat.h ke ġhurūr meñ be-vaj.h be-sabab

ehsāh-e-infi.āl-e-hazīmat kahāñ se laa.eñ

āsūdgi-e-lutf-o-ināyat ke saath saath

dil meñ dabī dabī sī qayāmat kahāñ se laa.eñ

vo josh-e-iztirāb pe kuchh sochne ke baad

hairat kahāñ se laa.eñ nadāmat kahāñ se laa.eñ

har lahza taaza taaza balāoñ kā sāmnā

na-āzmūda-kār kī jur.at kahāñ se laa.eñ

hai aaj bhī nigāh-e-mohabbat kī aarzū

par aisī ik nigāh kī qīmat kahāñ se laa.eñ

sab kuchh nasīb ho bhī to ai shorish-e-hayāt

tujh se nazar churāne kī aadat kahāñ se laa.eñ

bite hue dinon ki halawat kahan se laen

ek miThe miThe dard ki rahat kahan se laen

DhunDen kahan wo nala-e-shab-tab ka jamal

aah-e-sahar-gahi ki sabahat kahan se laen

samjhaen kaise dil ki nazakat ka majra

KHamoshi-e-nazar ki KHitabat kahan se laen

tark-e-talluqat ka ho jis se ehtimal

bebakiyon mein itni sadaqat kahan se laen

afsurdagi-e-zabt-e-alam aaj bhi sahi

lekin nashat-e-zabt-e-masarrat kahan se laen

har fath ke ghurur mein be-wajh be-sabab

ehsah-e-infial-e-hazimat kahan se laen

aasudgi-e-lutf-o-inayat ke sath sath

dil mein dabi dabi si qayamat kahan se laen

wo josh-e-iztirab pe kuchh sochne ke baad

hairat kahan se laen nadamat kahan se laen

har lahza taza taza balaon ka samna

na-azmuda-kar ki jurat kahan se laen

hai aaj bhi nigah-e-mohabbat ki aarzu

par aisi ek nigah ki qimat kahan se laen

sab kuchh nasib ho bhi to ai shorish-e-hayat

tujh se nazar churane ki aadat kahan se laen