bik jaenge hum husn-e-KHaridar agar hai

bik jā.eñge ham husn-e-ḳharīdār agar hai

nimTeñge koī barsar-e-paikār agar hai

kal us se hamesha ko tirī jaan chhuTegī

ik raat kā mehmān hai bīmār agar hai

bas ek nazar dil ke sahīfe kī taraf dekh

phir shauq se kar jaan tū inkār agar hai

hoñToñ ko bhale jumbish-e-alfāz garāñ ho

āñkhoñ hī se kar Dāliye iz.hār agar hai

lo kal se na.ī samt kā karte haiñ ta.ayyun

ai dost bichhaḌne kā hī isrār agar hai

ham jis ke liye umr gañvā baiThe haiñ yaaro

rakh legā bharam sāhab-e-kirdār agar hai

ai jān-e-'rashīd' is kā sabab tum to nahīñ ho

ye ḳhāk-nashīñ jaan se bezār agar hai

bik jaenge hum husn-e-KHaridar agar hai

nimTenge koi barsar-e-paikar agar hai

kal us se hamesha ko teri jaan chhuTegi

ek raat ka mehman hai bimar agar hai

bas ek nazar dil ke sahife ki taraf dekh

phir shauq se kar jaan tu inkar agar hai

honTon ko bhale jumbish-e-alfaz garan ho

aankhon hi se kar Daliye izhaar agar hai

lo kal se nai samt ka karte hain tayyun

ai dost bichhaDne ka hi israr agar hai

hum jis ke liye umr ganwa baiThe hain yaro

rakh lega bharam sahab-e-kirdar agar hai

ai jaan-e-'rashid' is ka sabab tum to nahin ho

ye KHak-nashin jaan se bezar agar hai