bikhra ke hum ghubar sa wahm-o-KHayal par

bikhrā ke ham ġhubār sā vahm-o-ḳhayāl par

pattoñ kī tarah Dolte phirte haiñ maal par

apne hī paañv bas meñ nahīñ aur yaar log

tanqīd kar rahe haiñ sitāroñ kī chaal par

ye maal āñchaloñ kā subuksār ābshār

sad-mauj-e-rañg-o-nūr hai lamhoñ kī faal par

bahte hujūm shaam ke lamhoñ kā sail ham

raqsāñ haiñ zehan jhūmte qadmoñ ke taal par

uljhe hue haiñ bahs meñ vāraftagān-e-shām

hai guftugū adab ke urūj-o-zavāl par

tai rah-guzār-e-pā hai na mauzū'-e-guftugū

whiskey ke dhuñdlake haiñ javāb-o-savāl par

'ġhālib' kā zikr thā abhī 'shelley' par aa ga.e

pahuñche 'mallarme' se jalāl-o-jamāl par

jhoñkoñ ke saath saath koī tā.er-e-ḳhayāl

aa baiThtā hai zehn kī shādāb Daal par

gard-e-safar se pyaar hai manzil kā ġham nahīñ

yuuñ chal rahe haiñ rahguzar-e-māh-o-sāl par

chhā.e hue haiñ soch ke saa.e kahīñ kahīñ

chhiTkī huī hai chāñdnī bām-e-ḳhayāl par

har saaya apnī apnī guphā meñ luḌhak gayā

ham log ghūmte rahe sunsān maal par

bikhra ke hum ghubar sa wahm-o-KHayal par

patton ki tarah Dolte phirte hain mal par

apne hi panw bas mein nahin aur yar log

tanqid kar rahe hain sitaron ki chaal par

ye mal aanchalon ka subuksar aabshaar

sad-mauj-e-rang-o-nur hai lamhon ki fal par

bahte hujum sham ke lamhon ka sail hum

raqsan hain zehan jhumte qadmon ke tal par

uljhe hue hain bahs mein waraftagan-e-sham

hai guftugu adab ke uruj-o-zawal par

tai rah-guzar-e-pa hai na mauzu'-e-guftugu

whiskey ke dhundlake hain jawab-o-sawal par

'ghaalib' ka zikr tha abhi 'shelley' par aa gae

pahunche 'mallarme' se jalal-o-jamal par

jhonkon ke sath sath koi taer-e-KHayal

aa baiThta hai zehn ki shadab Dal par

gard-e-safar se pyar hai manzil ka gham nahin

yun chal rahe hain rahguzar-e-mah-o-sal par

chhae hue hain soch ke sae kahin kahin

chhiTki hui hai chandni baam-e-KHayal par

har saya apni apni gupha mein luDhak gaya

hum log ghumte rahe sunsan mal par