bikhre hue taron se meri raat bhari hai

bikhre hue tāroñ se mirī raat bharī hai

ye nuur hai yā nuur kī daryūza-garī hai

hai aaj bhī pahlū meñ vahī zaḳhm-e-bahārāñ

ab tak mirī āñkhoñ meñ har ik shāḳh harī hai

duniyā meñ añdheroñ ke sivā aur rahā kyā

ik terī tamannā so charāġh-e-saharī hai

ab saath na de pā.eñge TuuTe hue baazū

uḌte hue lamhoñ se mirī ham-safrī hai

har lahza badaltī huī āñkhoñ pe na jaao

dil ke liye ummīd-e-fazā be-ḳhabarī hai

jalve kī basīrat ko samajhtī nahīñ āñkheñ

ā.īne kā maqdūr pareshāñ-nazarī hai

uḌte hue aate haiñ abhī sañg-e-tamannā

aur kār-gah-e-dil kī vahī shīshagarī hai

chup-chāp darīchoñ kī taraf dekhte phirnā

zinda haiñ to 'shahzād' yahī dar-badrī hai

bikhre hue taron se meri raat bhari hai

ye nur hai ya nur ki daryuza-gari hai

hai aaj bhi pahlu mein wahi zaKHm-e-bahaaran

ab tak meri aankhon mein har ek shaKH hari hai

duniya mein andheron ke siwa aur raha kya

ek teri tamanna so charagh-e-sahari hai

ab sath na de paenge TuTe hue bazu

uDte hue lamhon se meri ham-safri hai

har lahza badalti hui aankhon pe na jao

dil ke liye ummid-e-faza be-KHabari hai

jalwe ki basirat ko samajhti nahin aankhen

aaine ka maqdur pareshan-nazari hai

uDte hue aate hain abhi sang-e-tamanna

aur kar-gah-e-dil ki wahi shishagari hai

chup-chap darichon ki taraf dekhte phirna

zinda hain to 'shahzad' yahi dar-badri hai