bil-aKHir jism-o-jaan se KHu-e-asaish nikali hai

bil-āḳhir jism-o-jāñ se ḳhū-e-āsā.ish nikālī hai

baḌī mushkil se ghar meñ apnī gunjā.ish nikālī hai

zar-e-duniyā se mujh ko bū sī aatī thī ta'affun kī

abhī kuchh roz pahle hī ye ālā.ish nikālī hai

ye ḳhūbī bhī kisī merī ḳharābī se huī paidā

alag jo dūsroñ se tarz-e-ārā.ish nikālī hai

mirī vahshat ke aage vus'at-e-sahrā bahut kam hai

miyāñ bekār hī tum ne ye paimā.ish nikālī hai

hamārī zindagī par maut bhī hairān hai 'ġhā.er'

na jaane kis ne ye tārīḳh-e-paidā.ish nikālī hai

bil-aKHir jism-o-jaan se KHu-e-asaish nikali hai

baDi mushkil se ghar mein apni gunjaish nikali hai

zar-e-duniya se mujh ko bu si aati thi ta'affun ki

abhi kuchh roz pahle hi ye aalaish nikali hai

ye KHubi bhi kisi meri KHarabi se hui paida

alag jo dusron se tarz-e-araish nikali hai

meri wahshat ke aage wus'at-e-sahra bahut kam hai

miyan bekar hi tum ne ye paimaish nikali hai

hamari zindagi par maut bhi hairan hai 'ghaer'

na jaane kis ne ye tariKH-e-paidaish nikali hai