bolna baada-kashon se na zara ai waiz

bolnā bāda-kashoñ se na zarā ai vaa.iz

kaan pakḌūñgā jo qulqul ko sunā ai vaa.iz

duḳhtar-e-raz ko jo kahtā hai burā ai vaa.iz

us afīfa ne tirā kyā hai kiyā ai vaa.iz

jām-e-kausar kī jo ḳhvāhish hai dam-e-bāda-kashī

bazm-e-rindān-e-qadah-nosh meñ aa ai vaa.iz

joshish-e-shīsha-o-sāġhar-shiknī kā hai bayāñ

muñh toḌe koī badmast tirā ai vaa.iz

jām-e-mai daur meñ lā charḳh-e-kuhan kī sūrat

dekhtā hai jo tujhe rañg nayā ai vaa.iz

TuuT jaa.e na kahīñ tere kaḌe hāthoñ se

dil mirā shīsha-e-nāzuk hai sunā ai vaa.iz

loT ho tū jo na mastoñ kī tarah kyā ma.anī

muñh lagā bint-e-inab ko to zarā ai vaa.iz

pārsā.ī to zarā zāhid-e-makkār kī dekh

rahn-e-mai ḳhirqa-sālūs huā ai vaa.iz

chaḌh ke mimbar pe na makkār daroġh itnā bol

muñh meñ bū aatī hai jhūTe ke sunā ai vaa.iz

har-nafas 'shād' yahī qaul hai matvāloñ kā

ham ne sauñpā tujhe shaitān ko jā ai vaa.iz

bolna baada-kashon se na zara ai waiz

kan pakDunga jo qulqul ko suna ai waiz

duKHtar-e-raz ko jo kahta hai bura ai waiz

us afifa ne tera kya hai kiya ai waiz

jam-e-kausar ki jo KHwahish hai dam-e-baada-kashi

bazm-e-rindan-e-qadah-nosh mein aa ai waiz

joshish-e-shisha-o-saghar-shikni ka hai bayan

munh toDe koi badmast tera ai waiz

jam-e-mai daur mein la charKH-e-kuhan ki surat

dekhta hai jo tujhe rang naya ai waiz

TuT jae na kahin tere kaDe hathon se

dil mera shisha-e-nazuk hai suna ai waiz

loT ho tu jo na maston ki tarah kya mani

munh laga bint-e-inab ko to zara ai waiz

parsai to zara zahid-e-makkar ki dekh

rahn-e-mai KHirqa-salus hua ai waiz

chaDh ke mimbar pe na makkar darogh itna bol

munh mein bu aati hai jhuTe ke suna ai waiz

har-nafas 'shad' yahi qaul hai matwalon ka

hum ne saunpa tujhe shaitan ko ja ai waiz