bolte bolte jab sirf zaban rah gae hum

bolte bolte jab sirf zabāñ rah ga.e ham

tab ishāre se batāyā ki kahāñ rah ga.e ham

hameñ itnī baḌī duniyā kā pata thoḌī thā

jahāñ ham tum huā karte the vahāñ rah ga.e ham

ham makāñ bhī the makīñ bhī the ki bāzār thā garm

phir ḳhasāra huā aur sirf makāñ rah ga.e ham

der tak ḳhālī makāñ ḳhālī nahīñ chhoḌte haiñ

aap tab the hī nahīñ aap ke haañ rah ga.e ham

ghar hī aisā thā ye kuchh dohrī masahrī vaalā

apnā rahne ke alāva bhī yahāñ rah ga.e ham

ek āvāz ke do hisse hue Thiik huā

tum vahāñ rah ga.e ḳhāmosh yahāñ rah ga.e ham

paañv darzoñ meñ Tikā.e hue sar raḳhnoñ meñ

is nihāñ-ḳhāne meñ rah rah ke ayaañ rah ga.e ham

bolte bolte jab sirf zaban rah gae hum

tab ishaare se bataya ki kahan rah gae hum

hamein itni baDi duniya ka pata thoDi tha

jahan hum tum hua karte the wahan rah gae hum

hum makan bhi the makin bhi the ki bazar tha garm

phir KHasara hua aur sirf makan rah gae hum

der tak KHali makan KHali nahin chhoDte hain

aap tab the hi nahin aap ke han rah gae hum

ghar hi aisa tha ye kuchh dohri masahri wala

apna rahne ke alawa bhi yahan rah gae hum

ek aawaz ke do hisse hue Thik hua

tum wahan rah gae KHamosh yahan rah gae hum

panw darzon mein Tikae hue sar raKHnon mein

is nihan-KHane mein rah rah ke ayan rah gae hum