bujh gai sham-e-haram bab-e-kalisa na khula

bujh ga.ī sham-e-haram bāb-e-kalīsā na khulā

khul ga.e zaḳhm ke lab terā darīcha na khulā

dar-e-tauba se bagūloñ kī tarah guzre log

abr kī tarah umaD aa.e jo mai-ḳhāna khulā

shahr-dar-shahr phirī merī gunāhoñ kī bayāz

baa'z nazroñ pe mirā soz-e-hakīmāna khulā

nāznīnoñ meñ rasā.ī kā ye 'ālam thā kabhī

laakh pahroñ meñ bhī darvāze pe darvāza khulā

ham parī-zādoñ meñ khele shab-e-afsūñ meñ pale

ham se bhī tere tilismāt kā 'uqda na khulā

ek ik shakl ko dekhā hai baḌī hasrat se

ajnabī kaun hai aur kaun shanāsā na khulā

ret par pheñk ga.ī 'aql kī gustāḳh-labī

phir kabhī kashf-o-karāmāt kā dariyā na khulā

bujh gai sham-e-haram bab-e-kalisa na khula

khul gae zaKHm ke lab tera daricha na khula

dar-e-tauba se bagulon ki tarah guzre log

abr ki tarah umaD aae jo mai-KHana khula

shahr-dar-shahr phiri meri gunahon ki bayaz

ba'z nazron pe mera soz-e-hakimana khula

nazninon mein rasai ka ye 'alam tha kabhi

lakh pahron mein bhi darwaze pe darwaza khula

hum pari-zadon mein khele shab-e-afsun mein pale

hum se bhi tere tilismat ka 'uqda na khula

ek ek shakl ko dekha hai baDi hasrat se

ajnabi kaun hai aur kaun shanasa na khula

ret par phenk gai 'aql ki gustaKH-labi

phir kabhi kashf-o-karamat ka dariya na khula