bujhai hai teri nazron se aksar tishnagi maine

bujhā.ī hai tirī nazroñ se aksar tishnagī maiñ ne

kiyā hai muddatoñ is tarah shaġhl-e-mai-kashī maiñ ne

ḳhushā vo marhale jin marhaloñ meñ jaise ghabrā kar

mujhe āvāz dī tum ne tumheñ āvāz dī maiñ ne

mirī dīvāngī ko ahl-e-īmāñ kufr kahte haiñ

banāyā hai bahut ūñchā maqām-e-bandagī maiñ ne

ab is ko intihā-e-zauq kahiye yā junūñ kahiye

vo parde meñ rahe tasvīr dil meñ khīñch lī maiñ ne

huī haiñ laġhzisheñ donoñ se ham donoñ hī mujrim haiñ

ki dāmān-e-vafā chhoḌā kabhī tum ne kabhī maiñ ne

maiñ us mahfil ko Thukrā kar chalā aayā huuñ ai 'rahmat'

jahāñ mahsūs kī iḳhlās-o-ulfat kī kamī maiñ ne

bujhai hai teri nazron se aksar tishnagi main ne

kiya hai muddaton is tarah shaghl-e-mai-kashi main ne

KHusha wo marhale jin marhalon mein jaise ghabra kar

mujhe aawaz di tum ne tumhein aawaz di main ne

meri diwangi ko ahl-e-iman kufr kahte hain

banaya hai bahut uncha maqam-e-bandagi main ne

ab is ko intiha-e-zauq kahiye ya junun kahiye

wo parde mein rahe taswir dil mein khinch li main ne

hui hain laghzishen donon se hum donon hi mujrim hain

ki daman-e-wafa chhoDa kabhi tum ne kabhi main ne

main us mahfil ko Thukra kar chala aaya hun ai 'rahmat'

jahan mahsus ki iKHlas-o-ulfat ki kami main ne