bulate kyun ho aajiz ko bulana kya maza de hai

bulāte kyuuñ ho 'ājiz' ko bulānā kyā mazā de hai

ġhazal kam-baḳht kuchh aisī paḌhe hai dil hilā de hai

mohabbat kyā balā hai chain lenā hī bhulā de hai

zarā bhī aañkh jhapke hai to betābī jagā de hai

tire hāthoñ kī surḳhī ḳhud subūt is baat kā de hai

ki jo kah de hai dīvāna vo kar ke bhī dikhā de hai

ġhazab kī fitna-sāzī aa.e hai us āfat-e-jāñ ko

sharārat ḳhud kare hai aur hameñ tohmat lagā de hai

mirī barbādiyoñ kā Daal kar ilzām duniyā par

vo zālim apne muñh par haath rakh kar muskurā de hai

ab insānoñ kī bastī kā ye aalam hai ki mat pūchho

lage hai aag ik ghar meñ to ham-sāya havā de hai

kaleja thaam kar sunte haiñ lekin sun hī lete haiñ

mire yāroñ ko mere ġham kī talḳhī bhī mazā de hai

bulate kyun ho 'ajiz' ko bulana kya maza de hai

ghazal kam-baKHt kuchh aisi paDhe hai dil hila de hai

mohabbat kya bala hai chain lena hi bhula de hai

zara bhi aankh jhapke hai to betabi jaga de hai

tere hathon ki surKHi KHud subut is baat ka de hai

ki jo kah de hai diwana wo kar ke bhi dikha de hai

ghazab ki fitna-sazi aae hai us aafat-e-jaan ko

shararat KHud kare hai aur hamein tohmat laga de hai

meri barbaadiyon ka Dal kar ilzam duniya par

wo zalim apne munh par hath rakh kar muskura de hai

ab insanon ki basti ka ye aalam hai ki mat puchho

lage hai aag ek ghar mein to ham-saya hawa de hai

kaleja tham kar sunte hain lekin sun hi lete hain

mere yaron ko mere gham ki talKHi bhi maza de hai