bulbul gulon se dekh ke tujhko bigaD gaya

bulbul guloñ se dekh ke tujh ko bigaḌ gayā

qumrī kā tauq sarv kī gardan meñ paḌ gayā

chīñ-bar-jabīñ na ai but-e-chīñ rah ġhurūr se

tasvīr kā hai aib jo chehra bigaḌ gayā

aa.ī to hai pasand use chaal yaar kī

sun liijo paañv kabk-e-darī kā ukhaḌ gayā

pīchhe haTā na kūcha-e-qātil se apnā paañv

sar se taḌap ke chaar qadam aage dhaḌ gayā

khīñchī jo merī tarah se qumrī ne āh-e-sard

jaaḌe ke maare sarv chaman meñ akaḌ gayā

shīrīñ ke shefta hue parvez-o-kohkan

shā.ir huuñ maiñ ye kahtā huuñ mazmūn laḌ gayā

allāh-re shauq apnī jabīñ ko ḳhabar nahīñ

us but ke āstāne kā patthar ragaḌ gayā

darmāñ se aur dard hamārā huā do-chand

marham se daaġh siine meñ nāsūr paḌ gayā

guldasta ban ke raunaq-e-bazm-e-shahāñ huā

kuuḌā jo us faqīr ke takiye se jhaḌ gayā

niklā na jism se dil-e-nālāñ sharīk-e-rūh

manzil meñ rañg naaqa se apne bichhaḌ gayā

pahuñchā majāz se jo haqīqat kī kunah ko

ye jaan le ki rāste meñ pher paḌ gayā

furqat kī shab meñ ziist ne apnī vafā na kī

qabl-e-sahar charāġh hamārā na baḌh gayā

paatā huuñ shauq-e-vasl meñ ahbāb kī kamī

husn-o-jamāl-e-yār meñ kuchh farq paḌ gayā

lāshoñ ko āshiqoñ ke na uThvā galī se yaar

basne kā phir ye gaañv nahīñ jab ujaḌ gayā

dekhā tujhe jo ḳhūn-e-shahīdāñ se surḳh-posh

turk-e-falak zamīñ meñ ḳhajālat se gaḌ gayā

barsoñ kī raah aa ke azīzāñ nikal ga.e

afsos kārvāñ se maiñ apne bichhaḌ gayā

aayā jo sharh-e-la.al-e-lab-e-yār kā ḳhayāl

jhanDā qalam kā apne badaḳhshāñ meñ gaḌ gayā

maiñ nai liyā baġhal meñ parī-rū visāl ko

dev-e-firāq kashtī meñ mujh se bichhaḌ gayā

'ātish' na pūchh haal tū mujh dard-mand kā

siine meñ daaġh daaġh meñ nāsūr paḌ gayā

bulbul gulon se dekh ke tujh ko bigaD gaya

qumri ka tauq sarw ki gardan mein paD gaya

chin-bar-jabin na ai but-e-chin rah ghurur se

taswir ka hai aib jo chehra bigaD gaya

aai to hai pasand use chaal yar ki

sun lijo panw kabk-e-dari ka ukhaD gaya

pichhe haTa na kucha-e-qatil se apna panw

sar se taDap ke chaar qadam aage dhaD gaya

khinchi jo meri tarah se qumri ne aah-e-sard

jaDe ke mare sarw chaman mein akaD gaya

shirin ke shefta hue parwez-o-kohkan

shair hun main ye kahta hun mazmun laD gaya

allah-re shauq apni jabin ko KHabar nahin

us but ke aastane ka patthar ragaD gaya

darman se aur dard hamara hua do-chand

marham se dagh sine mein nasur paD gaya

guldasta ban ke raunaq-e-bazm-e-shahan hua

kuDa jo us faqir ke takiye se jhaD gaya

nikla na jism se dil-e-nalan sharik-e-ruh

manzil mein rang naqa se apne bichhaD gaya

pahuncha majaz se jo haqiqat ki kunah ko

ye jaan le ki raste mein pher paD gaya

furqat ki shab mein zist ne apni wafa na ki

qabl-e-sahar charagh hamara na baDh gaya

pata hun shauq-e-wasl mein ahbab ki kami

husn-o-jamal-e-yar mein kuchh farq paD gaya

lashon ko aashiqon ke na uThwa gali se yar

basne ka phir ye ganw nahin jab ujaD gaya

dekha tujhe jo KHun-e-shahidan se surKH-posh

turk-e-falak zamin mein KHajalat se gaD gaya

barson ki rah aa ke azizan nikal gae

afsos karwan se main apne bichhaD gaya

aaya jo sharh-e-lal-e-lab-e-yar ka KHayal

jhanDa qalam ka apne badaKHshan mein gaD gaya

main nai liya baghal mein pari-ru visal ko

dew-e-firaq kashti mein mujh se bichhaD gaya

'atish' na puchh haal tu mujh dard-mand ka

sine mein dagh dagh mein nasur paD gaya