bulbul ka shor sun ke na mujhse raha gaya

bulbul kā shor sun ke na mujh se rahā gayā

maiñ be-dimāġh baaġh se uTh kar chalā gayā

logoñ ne paa.ī raakh kī Dherī mirī jagah

ik sho.ala mere dil se uThā thā chalā gayā

chehre pe baal bikhre rahe sab shab-e-visāl

ya.anī ki be-muravvatī se muñh chhupā gayā

chalnā huā to qāfila-e-rozgār se

maiñ juuñ sadā jaras kī akelā judā gayā

kyā baat rah ga.ī hai mire ishtiyāq se

ruq.e ke likhte likhte tarassul likhā gayā

sab zaḳhm-e-sadr un ne namak-band ḳhud kiye

sohbat jo bigḌī apne meñ saarā maza gayā

saare havās mere pareshāñ haiñ ishq meñ

is raah meñ ye qāfila saarā luTā gayā

bādal garaj garaj ke sunātā hai ya.anī yaañ

naubat se apnī har koī naubat bajā gayā

ve mahv-e-nāz hī rahe aa.e na is taraf

maiñ muntazir to jī se gayā un kā kyā gayā

dil de ke jaan 'mīr' ne pāyān-e-kār dī

ye sāda-lauh tarah na.ī dil lagā gayā

bulbul ka shor sun ke na mujh se raha gaya

main be-dimagh bagh se uTh kar chala gaya

logon ne pai rakh ki Dheri meri jagah

ek shoala mere dil se uTha tha chala gaya

chehre pe baal bikhre rahe sab shab-e-visal

yani ki be-murawwati se munh chhupa gaya

chalna hua to qafila-e-rozgar se

main jun sada jaras ki akela juda gaya

kya baat rah gai hai mere ishtiyaq se

ruqe ke likhte likhte tarassul likha gaya

sab zaKHm-e-sadr un ne namak-band KHud kiye

sohbat jo bigDi apne mein sara maza gaya

sare hawas mere pareshan hain ishq mein

is rah mein ye qafila sara luTa gaya

baadal garaj garaj ke sunata hai yani yan

naubat se apni har koi naubat baja gaya

we mahw-e-naz hi rahe aae na is taraf

main muntazir to ji se gaya un ka kya gaya

dil de ke jaan 'mir' ne payan-e-kar di

ye sada-lauh tarah nai dil laga gaya