bulbul sune na kyunki qafas mein chaman ki baat

bulbul sune na kyūñki qafas meñ chaman kī baat

āvāra-e-vatan ko lage ḳhush vatan kī baat

mat pūchh haal apne tū bīmār-e-ishq kā

hone lagī ab us ke to gor-o-kafan kī baat

hai mausam-e-bahār meñ bā-sad-zabāñ ḳhamosh

ġhunche ne kyā sunī thī kisī ke dahan kī baat

aish-o-tarab kā zikr karūñ kyā maiñ dosto

mujh ġham-zada se pūchhiye ranj-o-mehan kī baat

nāseh maiñ kyā kahūñ ki huā kis tarah se chaak

dast-e-junūñ se pūchho mire pairahan kī baat

thā āqil-e-zamāna pa dīvāna ho gayā

jis shaḳhs ne sunī mire dīvāna-pan kī baat

sar diije rāh-e-ishq meñ par muñh na moḌiye

patthar kī sī lakīr hai ye kohkan kī baat

bazm-e-chaman bhī us se ḳhajil hai bahār meñ

kyā pūchhne hai yaar tirī anjuman kī baat

yaaro maiñ kyā kahūñ ki jalā kis tarah patang

pūchho zabān-e-sham.a se us kī lagan kī baat

shāyad usī kā zikr ho har rahguzar meñ maiñ

suntā huuñ gosh-e-dil se har ik mard-o-zan kī baat

vo shai nahiñ hai ham meñ ki jis se mile vo yaar

aatī hai yuuñ to ham ko bhī har ek fan kī baat

'jur.at' ḳhizāñ ke aate chaman meñ rahā na kuchh

ik rah ga.ī zabāñ pe gul-o-yāsman kī baat

bulbul sune na kyunki qafas mein chaman ki baat

aawara-e-watan ko lage KHush watan ki baat

mat puchh haal apne tu bimar-e-ishq ka

hone lagi ab us ke to gor-o-kafan ki baat

hai mausam-e-bahaar mein ba-sad-zaban KHamosh

ghunche ne kya suni thi kisi ke dahan ki baat

aish-o-tarab ka zikr karun kya main dosto

mujh gham-zada se puchhiye ranj-o-mehan ki baat

naseh main kya kahun ki hua kis tarah se chaak

dast-e-junun se puchho mere pairahan ki baat

tha aaqil-e-zamana pa diwana ho gaya

jis shaKHs ne suni mere diwana-pan ki baat

sar dije rah-e-ishq mein par munh na moDiye

patthar ki si lakir hai ye kohkan ki baat

bazm-e-chaman bhi us se KHajil hai bahaar mein

kya puchhne hai yar teri anjuman ki baat

yaro main kya kahun ki jala kis tarah patang

puchho zaban-e-shama se us ki lagan ki baat

shayad usi ka zikr ho har rahguzar mein main

sunta hun gosh-e-dil se har ek mard-o-zan ki baat

wo shai nahin hai hum mein ki jis se mile wo yar

aati hai yun to hum ko bhi har ek fan ki baat

'jurat' KHizan ke aate chaman mein raha na kuchh

ek rah gai zaban pe gul-o-yasman ki baat