buri aur bhali sab guzar jaegi

burī aur bhalī sab guzar jā.egī

ye kashtī yūñhī paar utar jā.egī

milegā na gulchīñ ko gul kā patā

har ik pankhuḌī yuuñ bikhar jā.egī

raheñge na mallāh ye din sadā

koī din meñ gangā utar jā.egī

idhar ek ham aur zamāna udhar

ye baazī to so bisve har jā.egī

banāvaT kī sheḳhī nahīñ rahtī shaiḳh

ye 'izzat to jā.egī par jā.egī

na puurī huī haiñ umīdeñ na hoñ

yūñhī 'umr saarī guzar jā.egī

suneñge na 'hālī' kī kab tak sadā

yahī ek din kaam kar jā.egī

buri aur bhali sab guzar jaegi

ye kashti yunhi par utar jaegi

milega na gulchin ko gul ka pata

har ek pankhuDi yun bikhar jaegi

rahenge na mallah ye din sada

koi din mein ganga utar jaegi

idhar ek hum aur zamana udhar

ye bazi to so biswe har jaegi

banawaT ki sheKHi nahin rahti shaiKH

ye 'izzat to jaegi par jaegi

na puri hui hain umiden na hon

yunhi 'umr sari guzar jaegi

sunenge na 'haali' ki kab tak sada

yahi ek din kaam kar jaegi