but ki manind na apne ko banae rakhna

but kī mānind na apne ko banā.e rakhnā

jis jagah rahnā vahāñ dhuum machā.e rakhnā

ḳhud ko dariyā meñ na qatroñ sā milā.e rakhnā

munfarid hone kā ehsās dilā.e rakhnā

kaam farzāna-e-duniyā kā nahīñ ai nāseh

parcham-e-ishq zamāne meñ uThā.e rakhnā

chashm-e-maḳhlūq hai mīzān-e-razā-e-maulā

chashm-e-maḳhlūq meñ ḳhud ko na girā.e rakhnā

tujh ko denā ho agar zulmat-e-hijrāñ ko shikast

sham.a bujh jaa.e magar dil na bujhā.e rakhnā

qalb-e-ḳhuddār kī ḳhātir to hai zillat kā sabab

lau sadā us but-e-kāfir se lagā.e rakhnā

jis se miltī ho har ik lahza ġhazal kī ḳhushbū

sehn-e-ehsās meñ vo phuul khilā.e rakhnā

mere dil ko to kisī haal meñ manzūr nahīñ

fikr-e-duniyā meñ tirī yaad bhulā.e rakhnā

but ki manind na apne ko banae rakhna

jis jagah rahna wahan dhum machae rakhna

KHud ko dariya mein na qatron sa milae rakhna

munfarid hone ka ehsas dilae rakhna

kaam farzana-e-duniya ka nahin ai naseh

parcham-e-ishq zamane mein uThae rakhna

chashm-e-maKHluq hai mizan-e-raza-e-maula

chashm-e-maKHluq mein KHud ko na girae rakhna

tujh ko dena ho agar zulmat-e-hijran ko shikast

shama bujh jae magar dil na bujhae rakhna

qalb-e-KHuddar ki KHatir to hai zillat ka sabab

lau sada us but-e-kafir se lagae rakhna

jis se milti ho har ek lahza ghazal ki KHushbu

sehn-e-ehsas mein wo phul khilae rakhna

mere dil ko to kisi haal mein manzur nahin

fikr-e-duniya mein teri yaad bhulae rakhna