buton ka samna hai aur main hun

butoñ kā sāmnā hai aur maiñ huuñ

ḳhudā kā aasrā hai aur maiñ huuñ

yahāñ aa kar kareñ kyā yās-o-ummīd

dil-e-be-mudda.ā hai aur maiñ huuñ

milā jo ḳhaak meñ qadmoñ se chhuT ke

vo terā naqsh-e-pā hai aur maiñ huuñ

ḳhudā jaane buto hotā hai kyā haal

yahī gar dil mirā hai aur maiñ huuñ

zarā aane to de roz-e-qayāmat

sanam tū hai ḳhudā hai aur maiñ huuñ

sitam hai zulm hai un kī taraf se

mohabbat hai vafā hai aur maiñ huuñ

pasand ai 'mehr' hai ye qaul-e-ustād

sanam kūcha tirā hai aur maiñ huuñ

buton ka samna hai aur main hun

KHuda ka aasra hai aur main hun

yahan aa kar karen kya yas-o-ummid

dil-e-be-muddaa hai aur main hun

mila jo KHak mein qadmon se chhuT ke

wo tera naqsh-e-pa hai aur main hun

KHuda jaane buto hota hai kya haal

yahi gar dil mera hai aur main hun

zara aane to de roz-e-qayamat

sanam tu hai KHuda hai aur main hun

sitam hai zulm hai un ki taraf se

mohabbat hai wafa hai aur main hun

pasand ai 'mehr' hai ye qaul-e-ustad

sanam kucha tera hai aur main hun