buton ka sath diya but-shikan ka sath diya

butoñ kā saath diyā but-shikan kā saath diyā

fareb-e-ishq ne har husn-e-zan kā saath diyā

mire sukūt ne kab anjuman kā saath diyā

tumhārī chashm-e-suḳhan-dar-suḳhan kā saath diyā

tumhāre gesu-e-pur-ḳham pe marne vāloñ ne

jab aayā vaqt to dār-o-rasan kā saath diyā

bahār aa.ī to mahrūm-e-rañg-o-bū haiñ vahī

junūñ ne daur-e-ḳhizāñ meñ chaman kā saath diyā

bujhe jo pichhle pahar terī anjuman ke charāġh

to dāġh-e-dil ne mire anjuman kā saath diyā

chaman meñ ek hamīñ rah ga.e ḳhizāñ ke liye

ki bulbuloñ ne bhī rang-e-chaman kā saath diyā

ḳhudā kī shaan ki nang-e-vatan vo kahlā.eñ

jinhoñ ne mar ke bhī ḳhāk-e-vatan kā saath diyā

ḳhudā kā shukr ki mayyat to Dhak ga.ī apnī

ġhubār-e-rāh ne ik be-kafan kā saath diyā

kabhī jo bazm meñ us but key baat aa niklī

janāb-e-shaiḳh ne bhī barhaman kā saath diyā

vo tarz-e-nau ho ki tarz-e-kuhan 'vafā' ham ne

har ek tarah mazāq-e-suḳhan kā saath diyā

buton ka sath diya but-shikan ka sath diya

fareb-e-ishq ne har husn-e-zan ka sath diya

mere sukut ne kab anjuman ka sath diya

tumhaari chashm-e-suKHan-dar-suKHan ka sath diya

tumhaare gesu-e-pur-KHam pe marne walon ne

jab aaya waqt to dar-o-rasan ka sath diya

bahaar aai to mahrum-e-rang-o-bu hain wahi

junun ne daur-e-KHizan mein chaman ka sath diya

bujhe jo pichhle pahar teri anjuman ke charagh

to dagh-e-dil ne mere anjuman ka sath diya

chaman mein ek hamin rah gae KHizan ke liye

ki bulbulon ne bhi rang-e-chaman ka sath diya

KHuda ki shan ki nang-e-watan wo kahlaen

jinhon ne mar ke bhi KHak-e-watan ka sath diya

KHuda ka shukr ki mayyat to Dhak gai apni

ghubar-e-rah ne ek be-kafan ka sath diya

kabhi jo bazm mein us but key baat aa nikli

janab-e-shaiKH ne bhi barhaman ka sath diya

wo tarz-e-nau ho ki tarz-e-kuhan 'wafa' hum ne

har ek tarah mazaq-e-suKHan ka sath diya