buton ka zikr karo waiz KHuda ko kis ne dekha hai

butoñ kā zikr karo vaa.iz ḳhudā ko kis ne dekhā hai

sharār-e-sañg-e-mūsā ke liye barq-e-tajallā hai

ye hindostān hai yaañ parbatoñ kā roz melā hai

ḳhudā jaane vo but ai 'mehr' debī hai ki durgā hai

ye hindostān hai yaañ parbatoñ kā roz melā hai

koī kālī-bhavānī koī debī koī durgā hai

butān-e-hind meñ nām-e-ḳhudā kab koī tujh sā hai

tirī zulfeñ haiñ kaalī ai sanam tū aap durgā hai

dil-e-nālāñ tumhāre halqa-e-gesū meñ kahtā hai

maiñ hindostān meñ huuñ kāfiroñ ne mujh ko gherā hai

ye kis kāfir kī ḳhātir 'mehr' chakkar meñ tū rahtā hai

ye kis ke vāste gardish falak ke charḳh puujā hai

siyah rūmāl gorī gorī gardan meñ lapeTā hai

gale milvā diyā shām-e-sahar ko kyā tamāshā hai

galā vo gorā gorā us pe ik rūmāl kaalā hai

vahī aalam mirī āñkhoñ meñ ab din-rāt phirtā hai

tasavvur us sanam kā hai hameñ ka.abe se kyā matlab

charāġh apnā hai dāġh-e-dil hai jo mandir meñ jaltā hai

kiyā hai ḳhuuñ mire dil kā balidān is ko kahte haiñ

ġham-e-furqat vo kāfir hai ki durgā paaTh kartā hai

judā hai ne.mat-e-duniyā se lazzat bosa-e-lab kī

vo jogī ho gayā jis ne ye mohan-bhog chakkhā hai

sharārat se sharārat hai buto lillāh baaz aao

jalāte ho jo mere dil ko tum kyā ye bhī lanka hai

halāl us ne kiyā ḳhūn-e-musalmāñ vaa.e bedardī

tirā dast-e-hinā.ī kāfir ab ye rañg laayā hai

hamesha hai ye nālāñ us sanam kī yaad meñ yārab

jase ham dil samajhte the vo nāqūs-e-kalīsā hai

baḌā andher hai kyūñkar na ho dil ko pareshānī

sarāsar pech kartī hai balā zulf-e-chalīpā hai

ajab aalam nazar aayā tire kūcha meñ o qātil

kahīñ koī sisaktā hai kahīñ koī taḌaptā hai

kahāñ vo qad kahāñ ye kunda-hā-e-nā-tarāshīda

na sarv aisā hai ne shamshād aisā hai na tuubā hai

batā jaa.ez hai kis maz.hab meñ ḳhūn-e-be-gunah zālim

tū hindū hai musalmāñ hai yahūdī hai ki tarsā hai

sune murda to jī uTThe badan meñ ruuh phir aa.e

gale meñ ai sanam nām-e-ḳhudā kyā taan palTā hai

ḳhudā aalam hai mazmūn-e-ḳhayālī haiñ tasavvur meñ

na mujh ko kuchh ta.alluq hai na merī us ko parvā hai

ḳhudā jaane kiyā kis but ne kāfir ik musalmāñ ko

janev hai gale meñ 'mehr' ke māthe pe Tiikā hai

kiyā kāfir ne kāfir 'mehr' se mard-e-musalmāñ ko

janev rishta-e-tasbīh dāġh-e-sajda Tiikā hai

buton ka zikr karo waiz KHuda ko kis ne dekha hai

sharar-e-sang-e-musa ke liye barq-e-tajalla hai

ye hindostan hai yan parbaton ka roz mela hai

KHuda jaane wo but ai 'mehr' debi hai ki durga hai

ye hindostan hai yan parbaton ka roz mela hai

koi kali-bhawani koi debi koi durga hai

butan-e-hind mein nam-e-KHuda kab koi tujh sa hai

teri zulfen hain kali ai sanam tu aap durga hai

dil-e-nalan tumhaare halqa-e-gesu mein kahta hai

main hindostan mein hun kafiron ne mujh ko ghera hai

ye kis kafir ki KHatir 'mehr' chakkar mein tu rahta hai

ye kis ke waste gardish falak ke charKH puja hai

siyah rumal gori gori gardan mein lapeTa hai

gale milwa diya sham-e-sahar ko kya tamasha hai

gala wo gora gora us pe ek rumal kala hai

wahi aalam meri aankhon mein ab din-raat phirta hai

tasawwur us sanam ka hai hamein kabe se kya matlab

charagh apna hai dagh-e-dil hai jo mandir mein jalta hai

kiya hai KHun mere dil ka balidan is ko kahte hain

gham-e-furqat wo kafir hai ki durga paTh karta hai

juda hai nemat-e-duniya se lazzat bosa-e-lab ki

wo jogi ho gaya jis ne ye mohan-bhog chakkha hai

shararat se shararat hai buto lillah baz aao

jalate ho jo mere dil ko tum kya ye bhi lanka hai

halal us ne kiya KHun-e-musalman wae bedardi

tera dast-e-hinai kafir ab ye rang laya hai

hamesha hai ye nalan us sanam ki yaad mein yarab

jase hum dil samajhte the wo naqus-e-kalisa hai

baDa andher hai kyunkar na ho dil ko pareshani

sarasar pech karti hai bala zulf-e-chalipa hai

ajab aalam nazar aaya tere kucha mein o qatil

kahin koi sisakta hai kahin koi taDapta hai

kahan wo qad kahan ye kunda-ha-e-na-tarashida

na sarw aisa hai ne shamshad aisa hai na tuba hai

bata jaez hai kis mazhab mein KHun-e-be-gunah zalim

tu hindu hai musalman hai yahudi hai ki tarsa hai

sune murda to ji uTThe badan mein ruh phir aae

gale mein ai sanam nam-e-KHuda kya tan palTa hai

KHuda aalam hai mazmun-e-KHayali hain tasawwur mein

na mujh ko kuchh talluq hai na meri us ko parwa hai

KHuda jaane kiya kis but ne kafir ek musalman ko

janew hai gale mein 'mehr' ke mathe pe Tika hai

kiya kafir ne kafir 'mehr' se mard-e-musalman ko

janew rishta-e-tasbih dagh-e-sajda Tika hai