buton ke Thukrae but-paraston ko anjuman se qarar aaya

butoñ ke Thukrā.e but-parastoñ ko anjuman se qarār aayā

tumhāre dair-o-haram se uTh kar hameñ suḳhan se qarār aayā

jabīñ na āñkhoñ se lab na aariz kī ik chhuvan se qarār aayā

na ārzū-e-butāñ rahe ham na is chalan se qarār aayā

koī jalan dil meñ aisī thī jo bujhī to soz-e-nazar se āḳhir

ye aisī ThanDak kī tishnagī thī jise tapan se qarār aayā

tumhārā chehra bhī zindagī bhar kī uljhanoñ se thakā huā thā

hamāre shāne kī justujū ko bhī is thakan se qarār aayā

alāhida zikr us kā maiñ ne kiyā hai jab bhī kisī ġhazal meñ

mizāj-e-rūh-e-suḳhan ko goyā mirī kahan se qarār aayā

ham ishq vāloñ ko meharbāno na chārāgar kā pata batāo

kahāñ sunā hai kisī bhī marhūm ko kafan se qarār aayā

haTā lī āñkhoñ se sabz sūrat basā.e haiñ ḳhvāb-e-sahrā in meñ

ḳhizāñ ke āshiq kī āgahī ko ujaaḌ ban se qarār aayā

buton ke Thukrae but-paraston ko anjuman se qarar aaya

tumhaare dair-o-haram se uTh kar hamein suKHan se qarar aaya

jabin na aankhon se lab na aariz ki ek chhuwan se qarar aaya

na aarzu-e-butan rahe hum na is chalan se qarar aaya

koi jalan dil mein aisi thi jo bujhi to soz-e-nazar se aaKHir

ye aisi ThanDak ki tishnagi thi jise tapan se qarar aaya

tumhaara chehra bhi zindagi bhar ki uljhanon se thaka hua tha

hamare shane ki justuju ko bhi is thakan se qarar aaya

alahida zikr us ka main ne kiya hai jab bhi kisi ghazal mein

mizaj-e-ruh-e-suKHan ko goya meri kahan se qarar aaya

hum ishq walon ko meharbano na chaaragar ka pata batao

kahan suna hai kisi bhi marhum ko kafan se qarar aaya

haTa li aankhon se sabz surat basae hain KHwab-e-sahra in mein

KHizan ke aashiq ki aagahi ko ujaD ban se qarar aaya