bund ashkon se agar lutf-e-rawani mange

buuñd ashkoñ se agar lutf-e-ravānī māñge

bulbula āñkhoñ se ḳhūnāba-fishānī māñge

bahr-e-ulfat meñ chalā hai to pahle mastūl

tiir se aah ke kashti-e-duḳhānī māñge

nukta-e-vasl dam-e-arz qalam par rakkhe

bosa chāhe to lab-e-shauq zabānī māñge

tā-qayāmat dil-e-bedār sunā.e har roz

ḳhvāb-e-rāhat tirā gar roz kahānī māñge

dil to dil afa.i-e-gesū vo balā hai kāfir

is kā kaaTā koī af.ī bhī na paanī māñge

tire qadmoñ kī badaulat hai nishāñ turbat par

is se baḌh kar koī kyā mar ke nishānī māñge

us javāñ ke ġham-e-hijrāñ ne kiyā hai būḌhā

ḳhizr bhī dekh ke jis but ko javānī māñge

chaah meñ us mah-e-naḳhshab ke shab-o-roz haiñ ġharq

qaaz jis kā mah-e-kan.āñ se shabānī māñge

ḳhārij imkāñ se hai 'shahbāz' shahīdoñ kā shumār

koī kis kis ke liye marsiya-ḳhvānī māñge

bund ashkon se agar lutf-e-rawani mange

bulbula aankhon se KHunaba-fishani mange

bahr-e-ulfat mein chala hai to pahle mastul

tir se aah ke kashti-e-duKHani mange

nukta-e-wasl dam-e-arz qalam par rakkhe

bosa chahe to lab-e-shauq zabani mange

ta-qayamat dil-e-bedar sunae har roz

KHwab-e-rahat tera gar roz kahani mange

dil to dil afai-e-gesu wo bala hai kafir

is ka kaTa koi afi bhi na pani mange

tere qadmon ki badaulat hai nishan turbat par

is se baDh kar koi kya mar ke nishani mange

us jawan ke gham-e-hijran ne kiya hai buDha

KHizr bhi dekh ke jis but ko jawani mange

chah mein us mah-e-naKHshab ke shab-o-roz hain gharq

qaz jis ka mah-e-kanan se shabani mange

KHarij imkan se hai 'shahbaz' shahidon ka shumar

koi kis kis ke liye marsiya-KHwani mange