buzurgon ne jo tahzibi asasa ghar pe rakha hai

buzurgoñ ne jo tahzībī asāsa ghar pe rakhā hai

lagāyā hai use āñkhoñ se maiñ ne sar pe rakhā hai

yahāñ kā ohda-o-mansab to māl-o-zar pe rakhā hai

magar insāf ham ne 'arsa-e-mahshar pe rakhā hai

tumhāre rāste meñ tīrgī maa.il nahīñ hogī

chale aao diyā ham ne jalā ke dar pe rakhā hai

mujhe ehsās-e-tanhā.ī nahīñ maanā ki tanhā huuñ

jo ḳhat likkhā hai tum ne vo mire bistar pe rakhā hai

asar mushkil hai kuchh kahnā batā.ūñ maiñ tumheñ kaise

hamārā faisla to bas pas-e-manzar pe rakhā hai

buzurgon ne jo tahzibi asasa ghar pe rakha hai

lagaya hai use aankhon se main ne sar pe rakha hai

yahan ka ohda-o-mansab to mal-o-zar pe rakha hai

magar insaf hum ne 'arsa-e-mahshar pe rakha hai

tumhaare raste mein tirgi mail nahin hogi

chale aao diya hum ne jala ke dar pe rakha hai

mujhe ehsas-e-tanhai nahin mana ki tanha hun

jo KHat likkha hai tum ne wo mere bistar pe rakha hai

asar mushkil hai kuchh kahna bataun main tumhein kaise

hamara faisla to bas pas-e-manzar pe rakha hai