chahaton ki jo dil ko aadat hai

chāhatoñ kī jo dil ko aadat hai

ye bhī insāñ kī ik zarūrat hai

ham farishte kahāñ se ban jaa.eñ

ishq insān kī jibillat hai

kaun aayā hai kaun aa.egā

be-sabab jāgne kī aadat hai

kyā mileñge jo kho ga.e ik baar

bhiiḌ meñ DhūñDhnā qayāmat hai

un ke andāz dushmanī meñ bhī

dostī kī ajab shabāhat hai

mere andar jo merā dushman hai

hū-ba-hū vo mirī hī sūrat hai

un ke va.adoñ se ye huā ma.alūm

jhuuT sab se baḌī sadāqat hai

is qadar duur kyuuñ nikal aa.e

ab to ghar lauTnā qayāmat hai

un ke lahje meñ un kī bātoñ meñ

chāñdnī-rāt kī sabāhat hai

ye kahānī bhī ḳhuub hai yaaro

har jagah ek sī ibārat hai

'vajd' yādoñ meñ un kī ġham rahnā

rāhatoñ kī hazār rāhat hai

kis liye 'vajd' dil-girafta ho

dushmanī dostoñ kī aadat hai

chahaton ki jo dil ko aadat hai

ye bhi insan ki ek zarurat hai

hum farishte kahan se ban jaen

ishq insan ki jibillat hai

kaun aaya hai kaun aaega

be-sabab jagne ki aadat hai

kya milenge jo kho gae ek bar

bhiD mein DhunDhna qayamat hai

un ke andaz dushmani mein bhi

dosti ki ajab shabahat hai

mere andar jo mera dushman hai

hu-ba-hu wo meri hi surat hai

un ke wadon se ye hua malum

jhuT sab se baDi sadaqat hai

is qadar dur kyun nikal aae

ab to ghar lauTna qayamat hai

un ke lahje mein un ki baaton mein

chandni-raat ki sabahat hai

ye kahani bhi KHub hai yaro

har jagah ek si ibarat hai

'wajd' yaadon mein un ki gham rahna

rahaton ki hazar rahat hai

kis liye 'wajd' dil-girafta ho

dushmani doston ki aadat hai