chahiye ishq mein is tarah fana ho jaana

chāhiye ishq meñ is tarah fanā ho jaanā

jis tarah aañkh uThe mahv-e-adā ho jaanā

kisī māshūq kā āshiq se ḳhafā ho jaanā

ruuh kā jism se goyā hai judā ho jaanā

maut hī aap ke bīmār kī qismat meñ na thī

varna kab zahr kā mumkin thā davā ho jaanā

apne pahlū meñ tujhe dekh ke hairat hai mujhe

ḳharq-e-ādat hai tirā vaada vafā ho jaanā

vaq.at-e-ishq kahāñ jab ye talavvun ho vahāñ

kabhī raazī kabhī āshiq se ḳhafā ho jaanā

jab mulāqāt huī tum se to takrār huī

aise milne se to behtar hai judā ho jaanā

chheḌ kuchh ho ki na ho baat huī ho ki na ho

baiThe baiThe unheñ aatā hai ḳhafā ho jaanā

mujh se phir jaa.e jo duniyā to balā se phir jaa.e

tū na ai aah zamāne kī havā ho jaanā

'ahsan' achchhā hai rahe māl-e-arab pesh-e-arab

de ke dil tum na giraftār-e-balā ho jaanā

chahiye ishq mein is tarah fana ho jaana

jis tarah aankh uThe mahw-e-ada ho jaana

kisi mashuq ka aashiq se KHafa ho jaana

ruh ka jism se goya hai juda ho jaana

maut hi aap ke bimar ki qismat mein na thi

warna kab zahr ka mumkin tha dawa ho jaana

apne pahlu mein tujhe dekh ke hairat hai mujhe

KHarq-e-adat hai tera wada wafa ho jaana

waqat-e-ishq kahan jab ye talawwun ho wahan

kabhi raazi kabhi aashiq se KHafa ho jaana

jab mulaqat hui tum se to takrar hui

aise milne se to behtar hai juda ho jaana

chheD kuchh ho ki na ho baat hui ho ki na ho

baiThe baiThe unhen aata hai KHafa ho jaana

mujh se phir jae jo duniya to bala se phir jae

tu na ai aah zamane ki hawa ho jaana

'ahsan' achchha hai rahe mal-e-arab pesh-e-arab

de ke dil tum na giraftar-e-bala ho jaana