chaak karte hain gareban is farawani se hum

chaak karte haiñ garebāñ is farāvānī se ham

roz ḳhil.at paate haiñ darbār-e-uryānī se ham

muntaḳhab karte haiñ maidān-e-shikast apne liye

ḳhaak par girte haiñ lekin auj-e-sultānī se ham

ham zamīn-e-qatl-gah par chalte haiñ siine ke bal

jāda-e-shamshīr sar karte haiñ peshānī se ham

haañ miyāñ duniyā kī cham-ḳham ḳhuub hai apnī jagah

ik zarā ghabrā ga.e haiñ dil kī vīrānī se ham

zof hai had se ziyāda lekin is ke bāvajūd

zindagī se haath uThā sakte haiñ āsānī se ham

dil se bāhar aaj tak ham ne qadam rakkhā nahīñ

dekhne meñ zāhirā lagte haiñ sailānī se ham

daulat-e-duniyā kahāñ rakkheñ jagah bhī ho kahīñ

bhar chuke haiñ apnā ghar be-sāz-o-sāmānī se ham

zarra zarra jagmagātī jalva-bārāni-e-dost

dekhte haiñ rauzan-e-dīvār hairānī se ham

aql vaalo ḳhair jaane do nahīñ samjhoge tum

jis jagah pahuñche haiñ rāh-e-chāk-dāmānī se ham

kārobār-e-zindagī se jī churāte haiñ sabhī

jaise durveshī se tum maslan jahāñbānī se ham

chaak karte hain gareban is farawani se hum

roz KHilat pate hain darbar-e-uryani se hum

muntaKHab karte hain maidan-e-shikast apne liye

KHak par girte hain lekin auj-e-sultani se hum

hum zamin-e-qatl-gah par chalte hain sine ke bal

jada-e-shamshir sar karte hain peshani se hum

han miyan duniya ki cham-KHam KHub hai apni jagah

ek zara ghabra gae hain dil ki virani se hum

zof hai had se ziyaada lekin is ke bawajud

zindagi se hath uTha sakte hain aasani se hum

dil se bahar aaj tak hum ne qadam rakkha nahin

dekhne mein zahira lagte hain sailani se hum

daulat-e-duniya kahan rakkhen jagah bhi ho kahin

bhar chuke hain apna ghar be-saz-o-samani se hum

zarra zarra jagmagati jalwa-barani-e-dost

dekhte hain rauzan-e-diwar hairani se hum

aql walo KHair jaane do nahin samjhoge tum

jis jagah pahunche hain rah-e-chaak-damani se hum

karobar-e-zindagi se ji churaate hain sabhi

jaise durweshi se tum maslan jahanbani se hum