chand chhat chhoD rah par nikla

chāñd chhat chhoḌ raah par niklā

ghar ko chhoḌā to dil se Dar niklā

log kahte the vo rahī manzil

umr bhar kā magar safar niklā

aañkh vaale to be-basar nikle

aur ik andhā dīda-var niklā

log the muntazir kināroñ par

duur kitnā vo Duub kar niklā

aaj bachchoñ ko DāñTtā hai magar

ḳhud vo kab ghar se pūchh kar niklā

chāñd niklā to yuuñ lagā mujh ko

shab kī dīvār meñ bhī dar niklā

kī nazar raat āsmāñ kī taraf

yuuñ lagā sar pe ik khañDar niklā

jis ko buzdil samajh rahā thā 'raaj

dekh terā hī ham-safar niklā

chand chhat chhoD rah par nikla

ghar ko chhoDa to dil se Dar nikla

log kahte the wo rahi manzil

umr bhar ka magar safar nikla

aankh wale to be-basar nikle

aur ek andha dida-war nikla

log the muntazir kinaron par

dur kitna wo Dub kar nikla

aaj bachchon ko DanTta hai magar

KHud wo kab ghar se puchh kar nikla

chand nikla to yun laga mujh ko

shab ki diwar mein bhi dar nikla

ki nazar raat aasman ki taraf

yun laga sar pe ek khanDar nikla

jis ko buzdil samajh raha tha 'raj

dekh tera hi ham-safar nikla