chand hain na tare hain aasman ke aangan mein

chāñd haiñ na taare haiñ āsmāñ ke āñgan meñ

raqs karte haiñ sho.ale ab to shab ke dāman meñ

vahshateñ haiñ raqsinda har galī har āñgan meñ

tere ahd-e-zarrīñ meñ ashk-e-ḳhūñ haiñ dāman meñ

kaun dhokā detā hai kaun TuuTā kartā hai

ab tamīz mushkil hai rāhbar meñ rahzan meñ

aise ab ke yaad aa.ī is mah-e-do-hafta kī

chāñdnī utar aa.ī jaise ghar ke āñgan meñ

makḌiyoñ ke jāloñ meñ jaise kiiḌe hoñ be-bas

uljhe haiñ kuchh aise hī ahl-e-fikr uljhan meñ

yuuñ nishāñ haiñ rāhoñ meñ kārvāñ ke qadmoñ ke

khil rahe huuñ har jānib phuul jis tarah ban meñ

phuul khilte the 'tālib' ḳhushbū raqs kartī thī

aaj sho.ale raqsāñ haiñ shāḳh-e-shām-e-gulshan meñ

chand hain na tare hain aasman ke aangan mein

raqs karte hain shoale ab to shab ke daman mein

wahshaten hain raqsinda har gali har aangan mein

tere ahd-e-zarrin mein ashk-e-KHun hain daman mein

kaun dhoka deta hai kaun TuTa karta hai

ab tamiz mushkil hai rahbar mein rahzan mein

aise ab ke yaad aai is mah-e-do-hafta ki

chandni utar aai jaise ghar ke aangan mein

makDiyon ke jalon mein jaise kiDe hon be-bas

uljhe hain kuchh aise hi ahl-e-fikr uljhan mein

yun nishan hain rahon mein karwan ke qadmon ke

khil rahe hun har jaanib phul jis tarah ban mein

phul khilte the 'talib' KHushbu raqs karti thi

aaj shoale raqsan hain shaKH-e-sham-e-gulshan mein