chand jab meri chhat pe aata hai

chāñd jab merī chhat pe aatā hai

har diye ko gale lagātā hai

jaur-o-zulm-o-sitam kī zulmat meñ

sabr kā jugnū jagmagātā hai

ġham ke sūraj kī tez kirnoñ se

dil kā tālāb suukh jaatā hai

niiñd uḌ jaatī hai siyāsat kī

jab qalam inqalāb laatā hai

kyā qarīb aa ga.ī mirī manzil

kyoñ qadam merā Dagmagātā hai

vo mirā aks-e-e.atibār hai jo

terī āñkhoñ meñ jhilmilātā hai

kaun har roz dard kā gul-dān

ashk ke phūloñ se sajātā hai

kis ne TuuTe diloñ ko joḌ diyā

shahr meñ kis ko fan ye aatā hai

apne darbār meñ 'qamar' bādal

roz dariyā ko kyoñ bulātā hai

chand jab meri chhat pe aata hai

har diye ko gale lagata hai

jaur-o-zulm-o-sitam ki zulmat mein

sabr ka jugnu jagmagata hai

gham ke suraj ki tez kirnon se

dil ka talab sukh jata hai

nind uD jati hai siyasat ki

jab qalam inqalab lata hai

kya qarib aa gai meri manzil

kyon qadam mera Dagmagata hai

wo mera aks-e-eatibar hai jo

teri aankhon mein jhilmilata hai

kaun har roz dard ka gul-dan

ashk ke phulon se sajata hai

kis ne TuTe dilon ko joD diya

shahr mein kis ko fan ye aata hai

apne darbar mein 'qamar' baadal

roz dariya ko kyon bulata hai