chand manga na kabhi humne sitare mange

chāñd māñgā na kabhī ham ne sitāre māñge

bas vo do din jo tire saath guzāre māñge

sirf ik dāġh-e-tamannā ke sivā kuchh na milā

dil ne kyā soch ke nazroñ ke ishāre māñge

ham ne jab jaam uThāyā hai to vo yaad aayā

jis kī ḳhātir mai-o-mīnā ke sahāre māñge

Dhal ga.ī raat to ḳhvāb-e-ruḳh-e-jānāñ TuuTā

bujh gayā chāñd to āñkhoñ ne sitāre māñge

uTh ga.ī aañkh to girdāb kā dil Duub gayā

khul ga.ī zulf to maujoñ ne kināre māñge

raat vo hashr gulistāñ meñ uThā hai yaaro

sub.h har phuul ne shabnam se sharāre māñge

chand manga na kabhi hum ne sitare mange

bas wo do din jo tere sath guzare mange

sirf ek dagh-e-tamanna ke siwa kuchh na mila

dil ne kya soch ke nazron ke ishaare mange

hum ne jab jam uThaya hai to wo yaad aaya

jis ki KHatir mai-o-mina ke sahaare mange

Dhal gai raat to KHwab-e-ruKH-e-jaanan TuTa

bujh gaya chand to aankhon ne sitare mange

uTh gai aankh to girdab ka dil Dub gaya

khul gai zulf to maujon ne kinare mange

raat wo hashr gulistan mein uTha hai yaro

subh har phul ne shabnam se sharare mange