chand par kyon main akeli jati

chāñd par kyoñ maiñ akelī jaatī

saath koī to sahelī jaatī

aao mil-jul ke saheñ hijr kī dhuup

mujh se tanhā nahīñ jhelī jaatī

bolnā mujh se na tum band karo

har taraf baat hai phailī jaatī

ham agar aql ko darbāñ karte

haath se dil kī havelī jaatī

haa.e sandal ke daraḳhtoñ kī ye raakh

jaan ḳhushbū kī na le lī jaatī

ban to saktā thā nayā ik kamra

apne āñgan kī chamelī jaatī

pyaas jaatī na agar sāhil par

kyoñ samundar meñ akelī jaatī

chāñd jhāñke jo kitchen meñ 'parvīn'

mujh se roTī nahīñ belī jaatī

chand par kyon main akeli jati

sath koi to saheli jati

aao mil-jul ke sahen hijr ki dhup

mujh se tanha nahin jheli jati

bolna mujh se na tum band karo

har taraf baat hai phaili jati

hum agar aql ko darban karte

hath se dil ki haweli jati

hae sandal ke daraKHton ki ye rakh

jaan KHushbu ki na le li jati

ban to sakta tha naya ek kamra

apne aangan ki chameli jati

pyas jati na agar sahil par

kyon samundar mein akeli jati

chand jhanke jo kitchen mein 'parwin'

mujh se roTi nahin beli jati