chand taron ko ziya deta hai

chāñd tāroñ ko ziyā detā hai

mujh ko mujh se vo milā detā hai

yuuñ bhī hotā hai kabhī raat ga.e

yak-ba-yak mujh ko jagā detā hai

aañkh kholūñ to vo hañstā hai bahut

ḳhvāb dekhūñ to Darā detā hai

chhuptā phirtā hai nigāhoñ se merī

dard bhī kitnā baḌā detā hai

us se pūchhūñ jo kabhī us kā patā

apnī āvāz sunā detā hai

yuuñ guzartā hai mirī jaan se vo

phuul sahrā meñ khilā detā hai

yaad rakhtā hai har ik vaqt mujhe

vaqt aane pe bhulā detā hai

phūñk detā hai mire dard meñ ruuh

ruuh meñ dard basā detā hai

har shab-e-tār na.e ḳhvāb kī os

merī palkoñ pe sajā detā hai

aur bahut duur guzargāhoñ meñ

ek qindīl jalā detā hai

chand taron ko ziya deta hai

mujh ko mujh se wo mila deta hai

yun bhi hota hai kabhi raat gae

yak-ba-yak mujh ko jaga deta hai

aankh kholun to wo hansta hai bahut

KHwab dekhun to Dara deta hai

chhupta phirta hai nigahon se meri

dard bhi kitna baDa deta hai

us se puchhun jo kabhi us ka pata

apni aawaz suna deta hai

yun guzarta hai meri jaan se wo

phul sahra mein khila deta hai

yaad rakhta hai har ek waqt mujhe

waqt aane pe bhula deta hai

phunk deta hai mere dard mein ruh

ruh mein dard basa deta hai

har shab-e-tar nae KHwab ki os

meri palkon pe saja deta hai

aur bahut dur guzargahon mein

ek qindil jala deta hai