chandi jaisa rang hai tera sone jaise baal

chāñdī jaisā rang hai terā sone jaise baal

ik tū hī dhanvān hai gorī baaqī sab kañgāl

har āñgan meñ aa.e tere ujle ruup kī dhuup

chhail-chhabelī raanī thoḌā ghūñghaT aur nikāl

bhar bhar nazreñ dekheñ tujh ko āte-jāte log

dekh tujhe badnām na kar de ye hirnī sī chaal

kitnī sundar naar ho koī maiñ āvāz na duuñ

tujh sā jis kā naam nahīñ hai vo jī kā janjāl

sāmne tū aa.e to dhaḌkeñ mil kar lākhoñ dil

ab jaanā dhartī par kaise aate haiñ bhauñchāl

biich meñ rañg-mahal hai terā khaa.ī chāroñ or

ham se milne kī ab gorī tū hī raah nikāl

kar sakte haiñ chaah tirī ab 'sarmad' yā 'mansūr'

mile kisī ko daar yahāñ aur khiñche kisī kī khaal

ye duniyā hai ḳhud-ġharazoñ kī lekin yaar 'qatīl'

tū ne hamārā saath diyā to jiye hazāroñ saal

chandi jaisa rang hai tera sone jaise baal

ek tu hi dhanwan hai gori baqi sab kangal

har aangan mein aae tere ujle rup ki dhup

chhail-chhabeli rani thoDa ghunghaT aur nikal

bhar bhar nazren dekhen tujh ko aate-jate log

dekh tujhe badnam na kar de ye hirni si chaal

kitni sundar nar ho koi main aawaz na dun

tujh sa jis ka nam nahin hai wo ji ka janjal

samne tu aae to dhaDken mil kar lakhon dil

ab jaana dharti par kaise aate hain bhaunchaal

bich mein rang-mahal hai tera khai chaaron or

hum se milne ki ab gori tu hi rah nikal

kar sakte hain chah teri ab 'sarmad' ya 'mansur'

mile kisi ko dar yahan aur khinche kisi ki khaal

ye duniya hai KHud-gharazon ki lekin yar 'qatil'

tu ne hamara sath diya to jiye hazaron sal