chandni raat hai taron ka jahan hai ai dost

chāñdnī raat hai tāroñ kā jahāñ hai ai dost

zindagī sāhil-e-dariyā pe ravāñ hai ai dost

ashk-shoī ke liye ab bhī haiñ dāman larzāñ

zindagī aaj bhī ik ḳhvāb-e-girāñ hai ai dost

ab bhī māyūs haiñ vābasta-e-taqdīr haiñ dil

ab bhī uThtā huā siine se dhuāñ hai ai dost

kitne be-rang se ḳhākoñ meñ lahū bhartī huuñ

dil kī dhaḌkan se mirā rishta-e-jāñ hai ai dost

dil ke dāġhoñ hī se taz.īn-e-gulistāñ kī hai

qābil-e-dīd bahāroñ kā samāñ hai ai dost

jabr kyā chiiz hai be-dād kī qīmat kyā hai

zehn āzād hai ehsān javāñ hai ai dost

dasht to dasht thā gulshan meñ bhī vahshat sī hai

kārvāñ kaun sī manzil meñ ravāñ hai ai dost

ye nayā saal hai nikhrī huī fikroñ kā amiiñ

yahī sarmāya yahī ganj-e-garāñ hai ai dost

chandni raat hai taron ka jahan hai ai dost

zindagi sahil-e-dariya pe rawan hai ai dost

ashk-shoi ke liye ab bhi hain daman larzan

zindagi aaj bhi ek KHwab-e-giran hai ai dost

ab bhi mayus hain wabasta-e-taqdir hain dil

ab bhi uThta hua sine se dhuan hai ai dost

kitne be-rang se KHakon mein lahu bharti hun

dil ki dhaDkan se mera rishta-e-jaan hai ai dost

dil ke daghon hi se tazin-e-gulistan ki hai

qabil-e-did bahaaron ka saman hai ai dost

jabr kya chiz hai be-dad ki qimat kya hai

zehn aazad hai ehsan jawan hai ai dost

dasht to dasht tha gulshan mein bhi wahshat si hai

karwan kaun si manzil mein rawan hai ai dost

ye naya sal hai nikhri hui fikron ka amin

yahi sarmaya yahi ganj-e-garan hai ai dost