chaar jaanib se sada aai meri

chaar jānib se sadā aa.ī mirī

sho.abada ban ga.ī tanhā.ī mirī

maut ko jab se muqābil dekhā

zindagī ho ga.ī shaidā.ī mirī

ab bhī yārān-e-girafta-dil ko

yaad hai anjuman-ārā.ī mirī

lab-kushā.ī se milī rif.at-e-dār

kis bulandī pe hai goyā.ī mirī

raat phailī to sar-e-ḳhalvat-e-ġham

be-karāñ ban ga.ī tanhā.ī mirī

sub.h chamkī to ġhubār-e-shab se

be-muhābāna sadā aa.ī mirī

umr bhar merā muḳhātib vo thā

baat jis ko na samajh aa.ī mirī

dil-e-nādāñ ne Duboyā 'mohsin'

kaam kuchh aa.ī na dānā.ī mirī

chaar jaanib se sada aai meri

shoabada ban gai tanhai meri

maut ko jab se muqabil dekha

zindagi ho gai shaidai meri

ab bhi yaran-e-girafta-dil ko

yaad hai anjuman-arai meri

lab-kushai se mili rifat-e-dar

kis bulandi pe hai goyai meri

raat phaili to sar-e-KHalwat-e-gham

be-karan ban gai tanhai meri

subh chamki to ghubar-e-shab se

be-muhabana sada aai meri

umr bhar mera muKHatib wo tha

baat jis ko na samajh aai meri

dil-e-nadan ne Duboya 'mohsin'

kaam kuchh aai na danai meri