chaDha kar tir nazron ki kaman par

chaḌhā kar tiir nazroñ kī kamāñ par

hasīnoñ ke qadam haiñ āsmāñ par

har ik lamha lage vo aa rahe hai

yaqīñ baḌhtā hī jaatā hai gumāñ par

koī va.ada vafā ho jaa.e shāyad

bharosa aaj bhī hai jān-e-jāñ par

utartī hī nahīñ bosoñ kī lazzat

abhī tak svaad rakkhā hai zabāñ par

kisī kī ruuh pyāsī rah na jaa.e

lihāzā ġham baraste hai jahāñ par

agar bhaTkā to us ko chhoḌ deñge

nazar rakkhe hue haiñ kārvāñ par

amaañ ham bhī kirā.e-dār hī haiñ

bhale hī naam likkhā hai makāñ par

chaDha kar tir nazron ki kaman par

hasinon ke qadam hain aasman par

har ek lamha lage wo aa rahe hai

yaqin baDhta hi jata hai guman par

koi wada wafa ho jae shayad

bharosa aaj bhi hai jaan-e-jaan par

utarti hi nahin boson ki lazzat

abhi tak swad rakkha hai zaban par

kisi ki ruh pyasi rah na jae

lihaza gham baraste hai jahan par

agar bhaTka to us ko chhoD denge

nazar rakkhe hue hain karwan par

aman hum bhi kirae-dar hi hain

bhale hi nam likkha hai makan par