chaDhi tere bimar-e-furqat ko tab hai

chaḌhī tere bīmār-e-furqat ko tab hai

bashiddat qalaq hai nihāyat ta.ab hai

marīz-e-mohabbat tirā jāñ-ba-lab hai

tajāhul sitam hai taġhāful ġhazab hai

vo aafat hai aafat hai aafat hai aafat

ġhazab hai ġhazab hai ġhazab hai ġhazab hai

galī yaar kī hai qadam rakhkhūñ kyūñ-kar

chalūñ sar ke bal yaañ maqām-e-adab hai

jo abrū dikhāyā to aariz bhī dikhlā

vo qur.ān hai ye hilāl-e-rajab hai

huī sub.h-e-pīrī kaTī ab javānī

ye jalnā faqat sham.a-sāñ shab kī shab hai

vo zulf-e-siyah hai ki mushk-e-ḳhutan hai

nahīñ ḳhat savād-e-dayār-e-halab hai

khulā kuchh na mujh par na aane kā manshā

jihat kuchh to farmā.iye kyā sabab hai

jo shajara thā majnūñ kā shajara hai merā

jo thā qais kā silsila vo nasab hai

ġhanīmat samajh vaqt-e-fursat ko ġhāfil

na haath aa.egā phir ye mauqa.a jo ab hai

ḳhudā kī ḳhudā.ī kā jalva hai o but

ye husn-e-javānī nahīñ shān-e-rab hai

karūñ kyuuñ na sāmān-e-ishrat muhayyā

shab-e-vasl-e-dilbar urūsī kī shab hai

jise log kahte haiñ shāh-e-ḳhurāsāñ

vo be-shubah ibn-e-amīr-e-arab hai

ġhulām us kā huuñ jo hai kausar kā saaqī

jabhī 'rind' mai-ḳhvār merā laqab hai

chaDhi tere bimar-e-furqat ko tab hai

bashiddat qalaq hai nihayat tab hai

mariz-e-mohabbat tera jaan-ba-lab hai

tajahul sitam hai taghaful ghazab hai

wo aafat hai aafat hai aafat hai aafat

ghazab hai ghazab hai ghazab hai ghazab hai

gali yar ki hai qadam rakhkhun kyun-kar

chalun sar ke bal yan maqam-e-adab hai

jo abru dikhaya to aariz bhi dikhla

wo quran hai ye hilal-e-rajab hai

hui subh-e-piri kaTi ab jawani

ye jalna faqat shama-san shab ki shab hai

wo zulf-e-siyah hai ki mushk-e-KHutan hai

nahin KHat sawad-e-dayar-e-halab hai

khula kuchh na mujh par na aane ka mansha

jihat kuchh to farmaiye kya sabab hai

jo shajara tha majnun ka shajara hai mera

jo tha qais ka silsila wo nasab hai

ghanimat samajh waqt-e-fursat ko ghafil

na hath aaega phir ye mauqa jo ab hai

KHuda ki KHudai ka jalwa hai o but

ye husn-e-jawani nahin shan-e-rab hai

karun kyun na saman-e-ishrat muhayya

shab-e-wasl-e-dilbar urusi ki shab hai

jise log kahte hain shah-e-KHurasan

wo be-shubah ibn-e-amir-e-arab hai

ghulam us ka hun jo hai kausar ka saqi

jabhi 'rind' mai-KHwar mera laqab hai