chal diya wo dekh kar pahlu meri taqsir ka

chal diyā vo dekh kar pahlū mirī taqsīr kā

dūsrā ruḳh us ne dekhā hī nahīñ tasvīr kā

baaqī saare ḳhat pe dhabbe āñsuoñ ke rah ga.e

ek hī jumla paḌhā maiñ ne tirī tahrīr kā

tū ne kaise lafz hoñToñ kī kamāñ meñ kas liye

itnā gahrā ghaav to hotā nahīñ hai tiir kā

uzr baaqī chaal meñ hai qaid go baaqī nahīñ

paañv aadī ho gayā hai is qadar zanjīr kā

aa ga.ī kashtī bhaTak kar aab se sū-e-sarāb

bhar gayā reg-e-ravāñ se jaal māhī-gīr kā

baat chhoTī to nahīñ tujh se bichhaḌne kī hai baat

faisla taslīm kar luuñ kis tarah taqdīr kā

yaar logoñ ne use katba banā Daalā 'adīm'

āḳhirī patthar bachā jo umr kī ta.amīr kā

dostoñ se bhī ta.alluq ban gayā hai vo 'adīm'

jo ta.alluq hai kisī shamshīr se shamshīr kā

zahr kī āñkhoñ meñ raushan sūrateñ do haiñ 'adīm'

shakl ik suqrāt kī aur ek chehra hiir kā

chal diya wo dekh kar pahlu meri taqsir ka

dusra ruKH us ne dekha hi nahin taswir ka

baqi sare KHat pe dhabbe aansuon ke rah gae

ek hi jumla paDha main ne teri tahrir ka

tu ne kaise lafz honTon ki kaman mein kas liye

itna gahra ghaw to hota nahin hai tir ka

uzr baqi chaal mein hai qaid go baqi nahin

panw aadi ho gaya hai is qadar zanjir ka

aa gai kashti bhaTak kar aab se su-e-sarab

bhar gaya reg-e-rawan se jal mahi-gir ka

baat chhoTi to nahin tujh se bichhaDne ki hai baat

faisla taslim kar lun kis tarah taqdir ka

yar logon ne use katba bana Dala 'adim'

aaKHiri patthar bacha jo umr ki tamir ka

doston se bhi talluq ban gaya hai wo 'adim'

jo talluq hai kisi shamshir se shamshir ka

zahr ki aankhon mein raushan suraten do hain 'adim'

shakl ek suqraat ki aur ek chehra hir ka