chal paDe hum dasht-e-be-saya bhi jangal ho gaya

chal paḌe ham dasht-e-be-sāya bhī jangal ho gayā

ham-safar jab mil ga.e jangal meñ mañgal ho gayā

maiñ thā bāġhī ḳhushk qatra bādaloñ ke des kā

sang-dil lamhoñ se Takrāyā to jal-thal ho gayā

haañ utar aatī haiñ is vaadī meñ pariyāñ chāñd kī

kahte haiñ ik ajnabī sayyāh pāgal ho gayā

ras bharī barsāt meñ khilne lagā dhartī kā ruup

jism kā ākāsh us ḳhushbū se bekal ho gayā

duur khiskī jā rahī hai paañv ke nīche zamīñ

sar ke uupar āsmāñ āñkhoñ se ojhal ho gayā

kitne qarnoñ ne tarāshā us but-e-bedard ko

kitnī nasloñ kā lahū us jism meñ hal ho gayā

'umr bhar donoñ ko qaid-e-bāhamī kī dī sazā

vo jo iġhvā kā muqadma thā so faisal ho gayā

har nafas hai sañg-bārī dil ke kachche ghaav par

lamha lamha zindagī kā kitnā bojhal ho gayā

chal paDe hum dasht-e-be-saya bhi jangal ho gaya

ham-safar jab mil gae jangal mein mangal ho gaya

main tha baghi KHushk qatra baadalon ke des ka

sang-dil lamhon se Takraya to jal-thal ho gaya

han utar aati hain is wadi mein pariyan chand ki

kahte hain ek ajnabi sayyah pagal ho gaya

ras bhari barsat mein khilne laga dharti ka rup

jism ka aakash us KHushbu se bekal ho gaya

dur khiski ja rahi hai panw ke niche zamin

sar ke upar aasman aankhon se ojhal ho gaya

kitne qarnon ne tarasha us but-e-bedard ko

kitni naslon ka lahu us jism mein hal ho gaya

'umr bhar donon ko qaid-e-bahami ki di saza

wo jo ighwa ka muqadma tha so faisal ho gaya

har nafas hai sang-bari dil ke kachche ghaw par

lamha lamha zindagi ka kitna bojhal ho gaya