chal raha hun pesh-o-pas-manzar se uktaya hua

chal rahā huuñ pesh-o-pas-manzar se uktāyā huā

ek se din raat ke chakkar se uktāyā huā

be-dilī hoshyār pahuñchī mujh se pahle thī vahāñ

meñ gayā jis anjuman meñ ghar se uktāyā huā

ho nahīñ paayā hai samjhauta kabhī donoñ ke biich

jhuuT andar se hai sach bāhar se uktāyā huā

ab muzayyan hai talaffuz se avāmunnās ke

sher sarf-o-nahv ke chakkar se uktāyā huā

ḳhvāhish-e-ījād hai apne ma.ānī kī use

lag rahā ye fe.al hai masdar se uktāyā huā

chubh rahe haiñ aañkh meñ ḳhvāb-e-pareshāñ raft ke

jism hai is niiñd ke bistar se uktāyā huā

umr lekin rā.egāñ kī us ke jamā o ḳharch meñ

thā hamesha zehn chīze-zar se uktāyā huā

aaj phir paḌhtā huuñ maktab meñ na.e ustād se

kal thā jin asbāq ke azbar se uktāyā huā

zaat apnī in meñ rakhtā huuñ barābar munqasim

dil mirā hai bahs-e-ḳhair-o-shar se uktāyā huā

chal raha hun pesh-o-pas-manzar se uktaya hua

ek se din raat ke chakkar se uktaya hua

be-dili hoshyar pahunchi mujh se pahle thi wahan

mein gaya jis anjuman mein ghar se uktaya hua

ho nahin paya hai samjhauta kabhi donon ke bich

jhuT andar se hai sach bahar se uktaya hua

ab muzayyan hai talaffuz se awamunnas ke

sher sarf-o-nahw ke chakkar se uktaya hua

KHwahish-e-ijad hai apne maani ki use

lag raha ye feal hai masdar se uktaya hua

chubh rahe hain aankh mein KHwab-e-pareshan raft ke

jism hai is nind ke bistar se uktaya hua

umr lekin raegan ki us ke jama o KHarch mein

tha hamesha zehn chize-zar se uktaya hua

aaj phir paDhta hun maktab mein nae ustad se

kal tha jin asbaq ke azbar se uktaya hua

zat apni in mein rakhta hun barabar munqasim

dil mera hai bahs-e-KHair-o-shar se uktaya hua