chalo ki KHud hi karen ru-numaiyan apni

chalo ki ḳhud hī kareñ rū-numā.iyāñ apnī

saroñ pe le ke chaleñ kaj-kulāhiyāñ apnī

sabhī ko paar utarne kī justujū lekin

na bādbāñ na samundar na kashtiyāñ apnī

vo kah gayā hai ki ik din zarūr ā.ūñgā

zarā qarīb se dekhūñgā dūriyāñ apnī

mire paḌos meñ aise bhī log baste haiñ

jo mujh meñ DhūñD rahe haiñ burā.iyāñ apnī

mujhe ḳhabar hai vo merī talāsh meñ hogā

maiñ chhoḌ aayā huuñ ik baat darmiyāñ apnī

maiñ buuñd buuñd kī ḳhairāt kab talak māñgūñ

sameT lā.ūñ samundar se sīpiyāñ apnī

mire kahe hue lafzoñ kī qadr-o-qīmat thī

maiñ apne kaan meñ kahne lagā azaañ apnī

karegā sar vahī is dasht-e-be-karāñ ko 'amīr'

jalā ke aa.e jo sāhil pe kashtiyāñ apnī

chalo ki KHud hi karen ru-numaiyan apni

saron pe le ke chalen kaj-kulahiyan apni

sabhi ko par utarne ki justuju lekin

na baadban na samundar na kashtiyan apni

wo kah gaya hai ki ek din zarur aaunga

zara qarib se dekhunga duriyan apni

mere paDos mein aise bhi log baste hain

jo mujh mein DhunD rahe hain buraiyan apni

mujhe KHabar hai wo meri talash mein hoga

main chhoD aaya hun ek baat darmiyan apni

main bund bund ki KHairaat kab talak mangun

sameT laun samundar se sipiyan apni

mere kahe hue lafzon ki qadr-o-qimat thi

main apne kan mein kahne laga azan apni

karega sar wahi is dasht-e-be-karan ko 'amir'

jala ke aae jo sahil pe kashtiyan apni