chalte chalte ye haalat hui rah mein bin piye mai-kashi ka maza aa gaya

chalte chalte ye hālat huī raah meñ bin piye mai-kashī kā mazā aa gayā

paas koī nahīñ thā magar yuuñ lagā koī dil se mire aa ke Takrā gayā

aaj pahle-pahal tajraba ye huā iid hotī hai aisī ḳhabar hī na thī

chāñd ko dekhne ghar se jab maiñ chalī dūsrā chāñd mere qarīb aa gayā

ai havā-e-chaman mujh pe ehsāñ na kar nik.hat-e-gul kī mujh ko zarūrat nahīñ

ishq kī raah meñ pyaar ke itr se mere saare badan ko vo mahkā gayā

hijr kā mere dil meñ añdherā kiye vo jo pardes meñ thā baserā kiye

jis ke aane kā koī gumāñ bhī na thā daf.atan mujh ko aa ke vo chauñkā gayā

rañg 'mumtāz' chehre kā aisā khilā zindagī meñ nayā hādisa ho gayā

aa.ina aur maiñ donoñ hairān the maiñ bhī sharmā ga.ī vo bhī sharmā gayā

chalte chalte ye haalat hui rah mein bin piye mai-kashi ka maza aa gaya

pas koi nahin tha magar yun laga koi dil se mere aa ke Takra gaya

aaj pahle-pahal tajraba ye hua id hoti hai aisi KHabar hi na thi

chand ko dekhne ghar se jab main chali dusra chand mere qarib aa gaya

ai hawa-e-chaman mujh pe ehsan na kar nikhat-e-gul ki mujh ko zarurat nahin

ishq ki rah mein pyar ke itr se mere sare badan ko wo mahka gaya

hijr ka mere dil mein andhera kiye wo jo pardes mein tha basera kiye

jis ke aane ka koi guman bhi na tha dafatan mujh ko aa ke wo chaunka gaya

rang 'mumtaz' chehre ka aisa khila zindagi mein naya hadisa ho gaya

aaina aur main donon hairan the main bhi sharma gai wo bhi sharma gaya