chalte hain gulshan-e-firdaus mein ghar lete hain

chalte haiñ gulshan-e-firdaus meñ ghar lete haiñ

tai ye manzil jo ḳhudā chāhe to kar lete haiñ

ishq kis vāste karte haiñ parī-zādoñ se

kis liye jaan par aafat ye bashar lete haiñ

dekhne bhī jo vo jaate haiñ kisī ghā.el ko

ik namak-dāñ meñ namak piis ke bhar lete haiñ

ḳhaak uḌ jaatī hai suthrāv udhar hotā hai

nīmchā kheñch ke vo baag jidhar lete haiñ

maiñ vo bīmār huuñ allāh se jā ke iisā

mire nusḳhoñ ke liye hukm-e-asar lete haiñ

yaar ne luuT liyā mujh vatan-āvāra ko

log ġhurbat meñ musāfir kī ḳhabar lete haiñ

is taraf haiñ ki jharoke meñ udhar baiThe haiñ

jā.eza kushtoñ kā apne vo kidhar lete haiñ

Thiik us rashk-e-chaman ko vo qabā hotī hai

naap kar jis kī rag-e-gul se kamar lete haiñ

kuchh Thikānā hai parī-zādoñ kī be-rahmī kā

ishq-bāzoñ se qisās aaTh pahar lete haiñ

ye nayā zulm hai ġhussa jo unheñ aatā hai

be-gunāhoñ ko bhī māḳhūz vo kar lete haiñ

shohrat us said-e-vafādār kī uḌ jaatī hai

tiir meñ jis ke lagāne ko vo par lete haiñ

kahte haiñ hūroñ ke dil meñ tire kushtoñ ke banāv

is liye ḳhuuñ meñ nahā kar vo nikhar lete haiñ

kis qadar nāma-o-paiġhām ko tarsāyā hai

bhejte haiñ ḳhabar apnī na ḳhabar lete haiñ

dam nikalte haiñ kalejoñ se lahū jaarī hai

saañs ulTī tire taftīda-jigar lete haiñ

chal khaḌe hoñge to hastī maiñ na phir Thahreñge

jān-e-jāñ chand nafas dam ye bashar lete haiñ

hai ishāra yahī mū-hā-e-mizha kā un kī

ham vo nashtar haiñ ki jo ḳhūn-e-jigar lete haiñ

sāmnā karte haiñ jis vaqt gadā kā tere

bādshah taḳht-e-ravāñ par se utar lete haiñ

sikka-e-dāġh-e-junūñ paas haiñ rahnā hoshyār

log raste meñ 'sharaf' jeb katar lete haiñ

chalte hain gulshan-e-firdaus mein ghar lete hain

tai ye manzil jo KHuda chahe to kar lete hain

ishq kis waste karte hain pari-zadon se

kis liye jaan par aafat ye bashar lete hain

dekhne bhi jo wo jate hain kisi ghael ko

ek namak-dan mein namak pis ke bhar lete hain

KHak uD jati hai suthraw udhar hota hai

nimcha khench ke wo bag jidhar lete hain

main wo bimar hun allah se ja ke isa

mere nusKHon ke liye hukm-e-asar lete hain

yar ne luT liya mujh watan-awara ko

log ghurbat mein musafir ki KHabar lete hain

is taraf hain ki jharoke mein udhar baiThe hain

jaeza kushton ka apne wo kidhar lete hain

Thik us rashk-e-chaman ko wo qaba hoti hai

nap kar jis ki rag-e-gul se kamar lete hain

kuchh Thikana hai pari-zadon ki be-rahmi ka

ishq-bazon se qisas aaTh pahar lete hain

ye naya zulm hai ghussa jo unhen aata hai

be-gunahon ko bhi maKHuz wo kar lete hain

shohrat us said-e-wafadar ki uD jati hai

tir mein jis ke lagane ko wo par lete hain

kahte hain huron ke dil mein tere kushton ke banaw

is liye KHun mein naha kar wo nikhar lete hain

kis qadar nama-o-paigham ko tarsaya hai

bhejte hain KHabar apni na KHabar lete hain

dam nikalte hain kalejon se lahu jari hai

sans ulTi tere taftida-jigar lete hain

chal khaDe honge to hasti main na phir Thahrenge

jaan-e-jaan chand nafas dam ye bashar lete hain

hai ishaara yahi mu-ha-e-mizha ka un ki

hum wo nashtar hain ki jo KHun-e-jigar lete hain

samna karte hain jis waqt gada ka tere

baadshah taKHt-e-rawan par se utar lete hain

sikka-e-dagh-e-junun pas hain rahna hoshyar

log raste mein 'sharaf' jeb katar lete hain